انجیل رفتگاں کی حدیثوں کے ساتھ ہوں

انجیل رفتگاں کی حدیثوں کے ساتھ ہوں

عیسیٰ نفس ہوں اور صلیبوں کے ساتھ ہوں

پابند رنگ و نقش ہوں تصویر کی طرح

میں بے حجاب اپنے حجابوں کے ساتھ ہوں

اوراق آرزو پہ بہ عنوان جاں کنی

میں بے نشاں سی چند لکیروں کے ساتھ ہوں

شاید یہ انتظار کی لو فیصلہ کرے

میں اپنے ساتھ ہوں کہ دریچوں کے ساتھ ہوں

تو فتح مند میرا تراشا ہوا صنم

میں بت تراش اپنی شکستوں کے ساتھ ہوں

موج صبا کی زد پہ سر‌ رہ گزار شوق

میں بھی نصیرؔ گھر کے چراغوں کے ساتھ ہوں

injil raftagan ki hadison ke sath hun

isa nafas hun aur salibon ke sath hun

paband-e-rang-o-naqsh hun taswir ki tarah

main be hijab apne hijabon ke sath hun

auraq-e-arzu pe ba unwan-e-jan kini

main be nishan si chand lakiron ke sath hun

shayad ye intizar ki lau faisla kare

main apne sath hun ke darichon ke sath hun

tu fath mand mera tarasha hua sanam

main but tarash apni shikaston ke sath hun

mauj-e-saba ki zad pe sar-e-rah guzar-e-shauq

main bhi nasir ghar ke charaghon ke sath hun