ذکر شب فراق سے وحشت اسے بھی تھی

ذکر شب فراق سے وحشت اسے بھی تھی

میری طرح کسی سے محبت اسے بھی تھی

مجھ کو بھی شوق تھا نئے چہروں کی دید کا

رستہ بدل کے چلنے کی عادت اسے بھی تھی

اس رات دیر تک وہ رہا محو گفتگو

مصروف میں بھی کم تھا فراغت اسے بھی تھی

مجھ سے بچھڑ کے شہر میں گھل مل گیا وہ شخص

حالانکہ شہر بھر سے عداوت اسے بھی تھی

وہ مجھ سے بڑھ کے ضبط کا عادی تھا جی گیا

ورنہ ہر ایک سانس قیامت اسے بھی تھی

سنتا تھا وہ بھی سب سے پرانی کہانیاں

شاید رفاقتوں کی ضرورت اسے بھی تھی

تنہا ہوا سفر میں تو مجھ پہ کھلا یہ بھید

سائے سے پیار دھوپ سے نفرت اسے بھی تھی

محسنؔ میں اس سے کہہ نہ سکا یوں بھی حال دل

درپیش ایک تازہ مصیبت اسے بھی تھی

zikr-e-shab-e-firaq se wahshat use bhi thi

meri tarah kisi se mohabbat use bhi thi

mujh ko bhi shauq tha nae chehron ki did ka

rasta badal ke chalne ki adat use bhi thi

is rat der tak wo raha mahw-e-guftugu

masruf mein bhi kam tha faraghat use bhi thi

mujh se bichhar ke shahr mein ghul mil gaya wo shakhs

halanke shahr bhar se adawat use bhi thi

wo mujh se barh ke zabt ka adi tha ji gaya

warna har ek sans qayamat use bhi thi

sunta tha wo bhi sab se purani kahaniyan

shayad rifaqaton ki zarurat use bhi thi

tanha hua safar mein to mujh pe khula ye bhed

sae se pyar dhup se nafrat use bhi thi

mohsin mein us se kah na saka yun bhi hal-e-dil

darpesh ek taza musibat use bhi thi