زباں رکھتا ہوں لیکن چپ کھڑا ہوں

زباں رکھتا ہوں لیکن چپ کھڑا ہوں

میں آوازوں کے بن میں گھر گیا ہوں

مرے گھر کا دریچہ پوچھتا ہے

میں سارا دن کہاں پھرتا رہا ہوں

مجھے میرے سوا سب لوگ سمجھیں

میں اپنے آپ سے کم بولتا ہوں

ستاروں سے حسد کی انتہا ہے

میں قبروں پر چراغاں کر رہا ہوں

سنبھل کر اب ہواؤں سے الجھنا

میں تجھ سے پیشتر بجھنے لگا ہوں

مری قربت سے کیوں خائف ہے دنیا

سمندر ہوں میں خود میں گونجتا ہوں

مجھے کب تک سمیٹے گا وہ محسنؔ

میں اندر سے بہت ٹوٹا ہوا ہوں

zaban rakhta hun lekin chup khara hun

main awazon ke ban mein ghar gaya hun

mire ghar ka daricha puchhta hai

main sara din kahan phirta raha hun

mujhe mere siwa sab log samjhen

main apne ap se kam bolta hun

sitaron se hasad ki intiha hai

main qabron par charaghan kar raha hun

sambhal kar ab hawaon se ulajhna

main tujh se peshtar bujhne laga hun

miri qurbat se kyun khaif hai duniya

samundar hun main khud mein gunjta hun

mujhe kab tak sametega wo mohsin

main andar se bahut tuta hua hun