اجڑے ہوئے لوگوں سے گریزاں نہ ہوا کر

اجڑے ہوئے لوگوں سے گریزاں نہ ہوا کر

حالات کی قبروں کے یہ کتبے بھی پڑھا کر

کیا جانئے کیوں تیز ہوا سوچ میں گم ہے

خوابیدہ پرندوں کو درختوں سے اڑا کر

اس شخص کے تم سے بھی مراسم ہیں تو ہوں گے

وہ جھوٹ نہ بولے گا مرے سامنے آ کر

ہر وقت کا ہنسنا تجھے برباد نہ کر دے

تنہائی کے لمحوں میں کبھی رو بھی لیا کر

وہ آج بھی صدیوں کی مسافت پہ کھڑا ہے

ڈھونڈا تھا جسے وقت کی دیوار گرا کر

اے دل تجھے دشمن کی بھی پہچان کہاں ہے

تو حلقۂ یاراں میں بھی محتاط رہا کر

اس شب کے مقدر میں سحر ہی نہیں محسنؔ

دیکھا ہے کئی بار چراغوں کو بجھا کر

ujre hue logon se gurezan na hua kar

halat ki qabron ke ye katbe bhi parha kar

kya janiye kyun tez hua soch mein gum hai

khwabida parindon ko darakhton se ura kar

us shakhs ke tum se bhi marasim hain to honge

wo jhut na bolega mire samne a kar

har waqt ka hansna tujhe barbad na kar de

tanhai ke lamhon mein kabhi ro bhi liya kar

wo aj bhi sadiyon ki masafat pe khara hai

dhunda tha jise waqt ki diwar gira kar

ai dil tujhe dushman ki bhi pahchan kahan hai

tu halqa-e-yaran mein bhi mohtat raha kar

is shab ke muqaddar mein sahar hi nahin mohsin

dekha hai kai bar charaghon ko bujha kar