سارے لہجے ترے بے زماں ایک میں

سارے لہجے ترے بے زماں ایک میں

اس بھرے شہر میں رائیگاں ایک میں

وصل کے شہر کی روشنی ایک تو

ہجر کے دشت میں کارواں ایک میں

بجلیوں سے بھری بارشیں زور پر

اپنی بستی میں کچا مکاں ایک میں

حسرتوں سے اٹے آسماں کے تلے

جلتی بجھتی ہوئی کہکشاں ایک میں

مجھ کو فارغ دنوں کی امانت سمجھ

بھولی بسری ہوئی داستاں ایک میں

رونقیں شور میلے جھمیلے ترے

اپنی تنہائی کا رازداں ایک میں

ایک میں اپنی ہی زندگی کا بھرم

اپنی ہی موت پر نوحہ خواں ایک میں

اس طرف سنگ باری ہر اک بام سے

اس طرف آئنوں کی دکاں ایک میں

وہ نہیں ہے تو محسنؔ یہ مت سوچنا

اب بھٹکتا پھروں گا کہاں ایک میں

sare lahje tire be zaman ek main

is bhare shahr mein raigan ek main

wasl ke shahr ki raushni ek to

hijr ke dasht mein karwan ek main

bijliyon se bhari barishen zor par

apni basti mein kachcha makan ek main

hasraton se ate asman ke tale

jalti bujhti hui kahkashan ek main

mujh ko farigh dinon ki amanat samajh

bhuli bisri hui dastan ek main

raunaqen shor mele jhamele tire

apni tanhai ka razdan ek main

ek main apni hi zindagi ka bharam

apni hi maut par nauha khwan ek main

is taraf sang bari har ik bam se

is taraf ainon ki dukan ek main

wo nahin hai to mohsin ye mat sochna

ab bhatakta phirunga kahan ek main