قتل چھپتے تھے کبھی سنگ کی دیوار کے بیچ

قتل چھپتے تھے کبھی سنگ کی دیوار کے بیچ

اب تو کھلنے لگے مقتل بھرے بازار کے بیچ

اپنی پوشاک کے چھن جانے پہ افسوس نہ کر

سر سلامت نہیں رہتے یہاں دستار کے بیچ

سرخیاں امن کی تلقین میں مصروف رہیں

حرف بارود اگلتے رہے اخبار کے بیچ

کاش اس خواب کی تعبیر کی مہلت نہ ملے

شعلے اگتے نظر آئے مجھے گلزار کے بیچ

ڈھلتے سورج کی تمازت نے بکھر کر دیکھا

سر کشیدہ مرا سایا صف اشجار کے بیچ

رزق ملبوس مکاں سانس مرض قرض دوا

منقسم ہو گیا انساں انہی افکار کے بیچ

دیکھے جاتے نہ تھے آنسو مرے جس سے محسنؔ

آج ہنستے ہوئے دیکھا اسے اغیار کے بیچ

qatl chhupte the kabhi sang ki diwar ke bich

ab to khulne lage maqtal bhare bazar ke bich

apni poshak ke chhin jane pe afsos na kar

sar salamat nahin rahte yahan dastar ke bich

surkhiyan amn ki talqin mein masruf rahen

harf-e-barud ugalte rahe akhbar ke bich

kash is khwab ki taabir ki mohlat na mile

shole ugte nazar ae mujhe gulzar ke bich

dhalte suraj ki tamazat ne bikhar kar dekha

sar kashida mira saya saf-e-ashjar ke bich

rizq malbus makan sans maraz qarz dawa

munqasam ho gaya insan unhi afkar ke bich

dekhe jate na the ansu mire jis se mohsin

aj hanste hue dekha use aghyar ke bich