پھر وہی میں ہوں وہی شہر بدر سناٹا

پھر وہی میں ہوں وہی شہر بدر سناٹا

مجھ کو ڈس لے نہ کہیں خاک بسر سناٹا

دشت ہستی میں شب غم کی سحر کرنے کو

ہجر والوں نے لیا رخت سفر سناٹا

کس سے پوچھوں کہ کہاں ہے مرا رونے والا

اس طرف میں ہوں مرے گھر سے ادھر سناٹا

تو صداؤں کے بھنور میں مجھے آواز تو دے

تجھ کو دے گا مرے ہونے کی خبر سناٹا

اس کو ہنگامۂ منزل کی خبر کیا دو گے

جس نے پایا ہو سر راہ گزر سناٹا

حاصل کنج قفس وہم بکف تنہائی

رونق شام سفر تا بہ سحر سناٹا

قسمت شاعر سیماب صفت دشت کی موت

قیمت ریزۂ الماس ہنر سناٹا

جان محسنؔ مری تقدیر میں کب لکھا ہے

ڈوبتا چاند ترا قرب گجر سناٹا

phir wahi main hun wahi shahr badar sannata

mujh ko das le na kahin khak basar sannata

dasht-e-hasti mein shab-e-gham ki sahar karne ko

hijr walon ne liya rakht-e-safar sannata

kis se puchhun ke kahan hai mira rone wala

is taraf main hun mire ghar se idhar sannata

tu sadaon ke bhanwar mein mujhe awaz to de

tujh ko dega mire hone ki khabar sannata

us ko hangama-e-manzil ki khabar kya doge

jis ne paya ho sar-e-rah guzar sannata

hasil-e-kunj-e-qafas wahm bakaf tanhai

raunaq-e-sham-e-safar ta ba sahar sannata

qismat shayar simab sifat dasht ki maut

qimat-e-reza-e-almas hunar sannata

jan mohsin miri taqdir mein kab likha hai

dubta chand tira qurb gajar sannata