میں دل پہ جبر کروں گا تجھے بھلا دوں گا

میں دل پہ جبر کروں گا تجھے بھلا دوں گا

مروں گا خود بھی تجھے بھی کڑی سزا دوں گا

یہ تیرگی مرے گھر کا ہی کیوں مقدر ہو

میں تیرے شہر کے سارے دیئے بجھا دوں گا

ہوا کا ہاتھ بٹاؤں گا ہر تباہی میں

ہرے شجر سے پرندے میں خود اڑا دوں گا

وفا کروں گا کسی سوگوار چہرے سے

پرانی قبر پہ کتبہ نیا سجا دوں گا

اسی خیال میں گزری ہے شام درد اکثر

کہ درد حد سے بڑھے گا تو مسکرا دوں گا

تو آسمان کی صورت ہے گر پڑے گا کبھی

زمیں ہوں میں بھی مگر تجھ کو آسرا دوں گا

بڑھا رہی ہیں مرے دکھ نشانیاں تیری

میں تیرے خط تری تصویر تک جلا دوں گا

بہت دنوں سے مرا دل اداس ہے محسنؔ

اس آئنے کو کوئی عکس اب نیا دوں گا

main dil pe jabr karunga tujhe bhula dunga

marunga khud bhi tujhe bhi kari saza dunga

ye tirgi mire ghar ka hi kyun muqaddar ho

main tere shahr ke sare diye bujha dunga

hawa ka hath bataunga har tabahi mein

hare shajar se parinde mein khud ura dunga

wafa karunga kisi sogwar chehre se

purani qabr pe katba naya saja dunga

isi khayal mein guzri hai sham dard aksar

ke dard had se barhega to muskura dunga

tu asman ki surat hai gir parega kabhi

zamin hun main bhi magar tujh ko asra dunga

barha rahi hain mire dukh nishaniyan teri

main tere khat tiri taswir tak jala dunga

bahut dinon se mira dil udas hai mohsin

is aine ko koi aks ab naya dunga