لبوں پہ حرف رجز ہے زرہ اتار کے بھی

لبوں پہ حرف رجز ہے زرہ اتار کے بھی

میں جشن فتح مناتا ہوں جنگ ہار کے بھی

اسے لبھا نہ سکا میرے بعد کا موسم

بہت اداس لگا خال و خد سنوار کے بھی

اب ایک پل کا تغافل بھی سہہ نہیں سکتے

ہم اہل دل کبھی عادی تھے انتظار کے بھی

وہ لمحہ بھر کی کہانی کہ عمر بھر میں کہی

ابھی تو خود سے تقاضے تھے اختصار کے بھی

زمین اوڑھ لی ہم نے پہنچ کے منزل پر

کہ ہم پہ قرض تھے کچھ گرد رہ گزار کے بھی

مجھے نہ سن مرے بے شکل اب دکھائی تو دے

میں تھک گیا ہوں فضا میں تجھے پکار کے بھی

مری دعا کو پلٹنا تھا پھر ادھر محسنؔ

بہت اجاڑ تھے منظر افق سے پار کے بھی

labon pe harf rajaz hai zira utar ke bhi

main jashn-e-fath manata hun jang har ke bhi

use lubha na saka mere baad ka mausam

bahut udas laga khal-o-khad sanwar ke bhi

ab ek pal ka taghaful bhi sah nahin sakte

ham ahl-e-dil kabhi adi the intizar ke bhi

wo lamha bhar ki kahani ke umr bhar mein kahi

abhi to khud se taqaze the ikhtisar ke bhi

zamin orh li ham ne pahunch ke manzil par

ke ham pe qarz the kuchh gard-e-rah guzar ke bhi

mujhe na sun mire be shakl ab dikhai to de

main thak gaya hun faza mein tujhe pukar ke bhi

miri dua ko palatna tha phir idhar mohsin

bahut ujar the manzar ufuq se par ke bhi