گہر کو جوہری صراف زر کو دیکھتے ہیں

گہر کو جوہری صراف زر کو دیکھتے ہیں

بشر کے ہیں جو مبصر بشر کو دیکھتے ہیں

نہ خوب و زشت نہ عیب و ہنر کو دیکھتے ہیں

یہ چیز کیا ہے بشر ہم بشر کو دیکھتے ہیں

وہ دیکھیں بزم میں پہلے کدھر کو دیکھتے ہیں

محبت آج ترے ہم اثر کو دیکھتے ہیں

وہ اپنی برش تیغ نظر کو دیکھتے ہیں

ہم ان کو دیکھتے ہیں اور جگر کو دیکھتے ہیں

جب اپنے گریہ و سوز جگر کو دیکھتے ہیں

سلگتی آگ میں ہم خشک و تر کو دیکھتے ہیں

رفیق جب مرے زخم جگر کو دیکھتے ہیں

تو چارہ گر انہیں وہ چارہ گر کو دیکھتے ہیں

نہ طمطراق کو نے کر و فر کو دیکھتے ہیں

ہم آدمی کے صفات و سیر کو دیکھتے ہیں

جو رات خواب میں اس فتنہ گر کو دیکھتے ہیں

نہ پوچھ ہم جو قیامت سحر کو دیکھتے ہیں

وہ روز ہم کو گزرتا ہے جیسے عید کا دن

کبھی جو شکل تمہاری سحر کو دیکھتے ہیں

جہاں کے آئینوں سے دل کا آئینہ ہے جدا

اس آئینے میں ہم آئینہ گر کو دیکھتے ہیں

بنا کے آئینہ دیکھے ہے پہلے آئینہ گر

ہنر ور اپنے ہی عیب و ہنر کو دیکھتے ہیں

guhar ko jauhari sarraf zar ko dekhte hain

bashar ke hain jo mubsir bashar ko dekhte hain

na khub-o-zisht na aib-o-hunar ko dekhte hain

ye chiz kya hai bashar ham bashar ko dekhte hain

wo dekhen bazm mein pahle kidhar ko dekhte hain

mohabbat aj tire ham asar ko dekhte hain

wo apni barash-e-tegh-e-nazar ko dekhte hain

ham un ko dekhte hain aur jigar ko dekhte hain

jab apne girya-o-soz-e-jigar ko dekhte hain

sulagti ag mein ham khushk-o-tar ko dekhte hain

rafiq jab mire zakhm-e-jigar ko dekhte hain

tu chara gar unhen wo chara gar ko dekhte hain

na tumturaq ko ne kar-o-far ko dekhte hain

ham admi ke sifat-o-sair ko dekhte hain

jo rat khwab mein is fitna gar ko dekhte hain

na puchh ham jo qayamat sahar ko dekhte hain

wo roz ham ko guzarta hai jaise eid ka din

kabhi jo shakl tumhari sahar ko dekhte hain

jahan ke ainon se dil ka aina hai juda

is aine mein ham aina gar ko dekhte hain

bana ke aina dekhe hai pahle aina gar

hunar war apne hi aib-o-hunar ko dekhte hain