گیسوئے تاب‌دار کو اور بھی تاب‌دار کر

گیسوئے تاب‌دار کو اور بھی تاب‌دار کر

ہوش و خرد شکار کر، قلب و نظر شکار کر

عشق بھی ہو حجاب میں، حُسن بھی ہو حجاب میں

یا تو خود آشکار ہو یا مجھے آشکار کر

تُو ہے محیطِ بےکراں، میں ہُوں ذرا سی آبُجو

یا مجھے ہمکنار کر یا مجھے بے کنار کر

میں ہُوں صدَف تو تیرے ہاتھ میرے گُہر کی آبرو

میں ہُوں خزَف تو تُو مجھے گوہرِ شاہوار کر

نغمۂ نَو بہار اگر میرے نصیب میں نہ ہو

اس دمِ نیم سوز کو طائرکِ بہار کر

باغِ بہشت سے مجھے حکمِ سفر دیا تھا کیوں

کارِ جہاں دراز ہے، اب مرا انتظار کر

روزِ حساب جب مرا پیش ہو دفترِ عمل

آپ بھی شرمسار ہو، مجھ کو بھی شرمسار کر

gesu-e-tabdar ko aur bhi tabdar kar

hosh-o-khirad shikar kar, qalb-o-nazar shikar kar

ishq bhi ho hijab mein, husn bhi ho hijab mein

ya to khud ashkar ho ya mujhe ashkar kar

tu hai muhit-e-bekaran, mein hun zara si abujo

ya mujhe hamkanar kar ya mujhe be kanar kar

main hun sadaf to tere hath mere guhar ki abru

main hun khazaf to tu mujhe gauhar-e-shahawar kar

naghma-e-nau bahar agar mere nasib mein na ho

is dam-e-nim soz ko tairak-e-bahar kar

bagh-e-bahisht se mujhe hukm-e-safar diya tha kyun

kar-e-jahan daraz hai, ab mira intizar kar

roz-e-hisab jab mira pesh ho daftar-e-amal

ap bhi sharmsar ho, mujh ko bhi sharmsar kar