گلے سے دل کے رہی یوں ہے زلف یار لپٹ — نظیر اکبر آبادی (Nazeer Akbarabadi)

گلے سے دل کے رہی یوں ہے زلف یار لپٹ

کہ جوں سپیرے کی گردن میں جائے مار لپٹ

مزے اٹھاتے کمر بند کی طرح سے اگر

کمر سے یار کی جاتے ہم ایک بار لپٹ

ہمارے پاس وہ آیا تو کھول کر آغوش

یہ چاہا جاویں ہم اس سے بہ انکسار لپٹ

وہیں وہ دور سرک کر عتاب سے بولا

ہمارے ساتھ نہ ہو کر تو بے قرار لپٹ

ہمیں جو چاہیں تو لپٹیں نظیرؔ اب ورنہ

تو چاہے لپٹے سو ممکن نہیں ہزار لپٹ