گلہ ہے شوق کو دل میں بھی تنگیِ جا کا

گلہ ہے شوق کو دل میں بھی تنگیِ جا کا

گہر میں محو ہوا اضطراب دریا کا

یہ جانتا ہوں کہ تو اور پاسخِ مکتوب!

مگر ستم زدہ ہوں ذوقِ خامہ فرسا کا

حنائے پائے خزاں ہے بہار اگر ہے یہی

دوامِ کلفتِ خاطر ہے عیش دنیا کا

ملی نہ وسعتِ جولانِ یک جنوں ہم کو

عدم کو لے گئے دل میں غبارِ صحرا کا

مرا شمول ہر اک دل کے پیچ و تاب میں ہے

میں مدّعا ہوں تپش نامۂ تمنّا کا

غمِ فراق میں تکلیفِ سیرِ باغ نہ دو

مجھے دماغ نہیں خندہ ہائے بے جا کا

ہنوز محرمیِ حسن کو ترستا ہوں

کرے ہے ہر بُنِ مو کام چشمِ بینا کا

دل اس کو، پہلے ہی ناز و ادا سے، دے بیٹھے

ہمیں دماغ کہاں حسن کے تقاضا کا

نہ کہہ کہ گریہ بہ مقدارِ حسرتِ دل ہے

مری نگاہ میں ہے جمع و خرچ دریا کا

فلک کو دیکھ کے کرتا ہوں اُس کو یاد اسدؔ

جفا میں اُس کی ہے انداز کارفرما کا

gila hai shauq ko dil mein bhi tangi-e-ja ka

guhar mein mahw hua iztirab dariya ka

ye janta hun ke tu aur pasukh-e-maktub!

magar sitam zada hun zauq-e-khama farsa ka

hina-e-pae khizan hai bahar agar hai yahi

dawam-e-kulfat-e-khatir hai aish duniya ka

mili na wusat-e-jaulan-e-yak junun ham ko

adam ko le gae dil mein ghubar-e-sahra ka

mira shamwil har ik dil ke pech-o-tab mein hai

main muddaa hun tapish nama-e-tamanna ka

gham-e-firaq mein taklif-e-sair-e-bagh na do

mujhe dimagh nahin khanda ha-e-be ja ka

hanoz mahrami-e-husn ko tarasta hun

kare hai har bun-e-mu kam chashm-e-bina ka

dil is ko, pahle hi naz-o-ada se, de baithe

hamen dimagh kahan husn ke taqaza ka

na kah ke girya ba miqdar-e-hasrat-e-dil hai

miri nigah mein hai jama-o-kharch dariya ka

falak ko dekh ke karta hun us ko yad asad

jafa mein us ki hai andaz karfarma ka