گلشن میں بندوبست بہ رنگِ دگر ہے آج

گلشن میں بندوبست بہ رنگِ دگر ہے آج

قمری کا طوق حلقۂ بیرونِ در ہے آج

معزولیِ تپش ہوئی افراطِ انتظار

چشمِ کشادہ حلقۂ بیرونِ در ہے آج

حیرت فروشِ صد نگَرانی ہے اضطرار

ہر رشتہ تارِ جَیب کا تارِ نظر ہے آج

اے عافیت! کنارہ کر، اے انتظام! چل

سیلابِ گریہ در پئے دیوار و در ہے آج

آتا ہے ایک پارۂ دل ہر فغاں کے ساتھ

تارِ نفس کمندِ شکارِ اثر ہے آج

ہوں داغِ نیم رنگیِ شامِ وصالِ یار

نورِ چراغِ بزم سے جوشِ سحر ہے آج

کرتی ہے عاجزی سفرِ سوختن تمام

پیراہنِ خَسَک میں غبارِ شرر ہے آج

تا صبح ہے بہ منزلِ مقصد رسیدنی

دودِ چراغِ خانہ غبارِ سفر ہے آج

دور اوفتادۂ چمنِ فکر ہے اسدؔ

مرغِ خیالِ بلبلِ بے بال و پر ہے آج

gulshan mein bandobast ba rang-e-digar hai aj

qumri ka tauq halqa-e-beron-e-dar hai aj

maazuli-e-tapish hui ifrat-e-intizar

chashm-e-kushada halqa-e-beron-e-dar hai aj

hairat farosh-e-sad nigrani hai iztirar

har rishta tar-e-jaib ka tar-e-nazar hai aj

ai afiyat! kinara kar, ai intizam! chal

sailab-e-girya dar piye diwar-o-dar hai aj

ata hai ek para-e-dil har fughan ke sath

tar-e-nafas kamand-e-shikar-e-asar hai aj

hun dagh-e-nim rangi-e-sham-e-wisal-e-yar

nur-e-charagh-e-bazm se josh-e-sahar hai aj

karti hai ajizi-e-safar-e-sokhtan tamam

pairahan-e-khasak mein ghubar-e-sharar hai aj

ta subh hai ba manzil-e-maqsad rassidini

dud-e-charagh-e-khana ghubar-e-safar hai aj

dur ofatada-e-chaman-e-fikr hai asad

murgh-e-khayal-e-bulbul-e-be bal-o-par hai aj