گلوں کے پردے میں شکلیں ہیں مہ جبینوں کی

گلوں کے پردے میں شکلیں ہیں مہ جبینوں کی

یہ ڈالیاں ہیں کہ ہیں ڈولیاں حسینوں کی

یہ آستینیں نہیں ہیں چنی ہوئی ظالم

بلائیں لی ہیں نگاہوں سے آستینوں کی

کسی کے جلوے سر عرش چھپ نہیں سکتے

کہ دور رسن ہیں نگاہیں بلند بینوں کی

پس فنا بھی نہ خالی رہیں یہ قصر رفیع

نہ ہوں مکین تو قبریں رہیں مکینوں کی

کس انتہا کی نزاکت ہے میرے شعروں میں

نظر لگے نہ کہیں ان کو نکتہ چینوں کی

جو نیند آئے تو یوں آئے موت آئے تو یوں

ہمارے سامنے شکلیں ہوں مہ جبینوں کی

ہم اپنے ملک سخن کو وسیع کرتے ہیں

ہمیں تلاش ہے ہر دم نئی زمینوں کی

انہیں غرض مری باتیں کھڑے کھڑے سن لیں

سنیں گے بیٹھ کے وہ اپنے ہم نشینوں کی

کہاں وہ چاندنی راتیں وہ چاند کے ٹکڑے

نہ اب وہ ہم ہیں نہ شکلیں ہیں مہ جبینوں کی

اترتے ہیں نئے مضموں جو آسماں سے ریاضؔ

تلاش رہتی ہے ہم کو نئی زمینوں کی

gulon ke parde mein shaklen hain mah jabinon ki

ye daliyan hain ke hain doliyan hasinon ki

ye astinen nahin hain chuni hui zalim

balaen li hain nigahon se astinon ki

kisi ke jalwe sar-e-arsh chhup nahin sakte

ke dur rasan hain nigahen buland bainon ki

pas fana bhi na khali rahen ye qasr-e-rafi

na hun makin to qabren rahen makinon ki

kis intiha ki nazakat hai mere sheron mein

nazar lage na kahin un ko nukta chainon ki

jo nind ae to yun ae maut ae to yun

hamare samne shaklen hun mah jabinon ki

ham apne mulk-e-sukhan ko wasi karte hain

hamen talash hai har dam nai zaminon ki

unhen gharaz miri baten khare khare sun len

sunenge baith ke wo apne ham nashinon ki

kahan wo chandni raten wo chand ke tukre

na ab wo ham hain na shaklen hain mah jabinon ki

utarte hain nae mazmun jo asman se riyaz

talash rahti hai ham ko nai zaminon ki