گل کی اور بلبل کی صحبت کو چمن کا شانہ ہے

گل کی اور بلبل کی صحبت کو چمن کا شانہ ہے

سرو ہے جوں شمع تس پر فاختہ پروانہ ہے

روز و شب یا نوحہ یا زاری ہے یا آہ و فغاں

یا الٰہی یہ کوئی دل ہے کہ ماتم خانہ ہے

تن کر اس کی تیغ کے آگے ہوا ہے سر بکف

ہے قیامت ہے غضب یہ دل ہے یا دیوانہ ہے

بلبل تصویر کی مانند صید دل کے تئیں

نے ہوا اڑنے کی نے پروائے آب و دانہ ہے

ایک حالت پر نہ دیکھا اس کو ہم نے ایک آن

گہ گل و گہ بلبل و گہ شمع و گہ پروانہ ہے

معتکف ہو شیخ اپنے دل میں مسجد سے نکل

صاحب دل کی بغل میں دل عبادت خانہ ہے

مے کشو مجھ کو تمہاری بزم کی حسرت نہیں

پاس میرے دیدہ و دل شیشہ و پیمانہ ہے

خواب میں تھے جب تلک تھا دل میں دنیا کا خیال

کھل گئیں آنکھیں تو دیکھا ہم نے سب افسانہ ہے

شعر استادانہ و حاتمؔ ہے بے باکانہ وضع

طبع آزادانہ و اوقات درویشانہ ہے

gul ki aur bulbul ki sohbat ko chaman ka shana hai

sarw hai jun shama tis par fakhta parwana hai

roz-o-shab ya nauha ya zari hai ya ah-o-fughan

ya ilahi ye koi dil hai ke matam khana hai

tan kar us ki tegh ke age hua hai sar bakaf

hai qayamat hai ghazab ye dil hai ya diwana hai

bulbul-e-taswir ki manind said-e-dil ke tain

ne hua urne ki ne parwae ab-o-dana hai

ek halat par na dekha us ko ham ne ek an

gah gul-o-gah bulbul-o-gah shama-o-gah parwana hai

motakaf ho shaikh apne dil mein masjid se nikal

sahab-e-dil ki baghal mein dil ibadat khana hai

mai kasho mujh ko tumhari bazm ki hasrat nahin

pas mere dida-o-dil shisha-o-paimana hai

khwab mein the jab talak tha dil mein duniya ka khayal

khul gain ankhen to dekha ham ne sab afsana hai

sher ustadana-o-hatim hai be bakana waza

tab-e-azadana-o-auqat darweshana hai