گریباں سے ترے کس نے نکالا صبح خنداں کو

گریباں سے ترے کس نے نکالا صبح خنداں کو

کیا کس نے نہاں دامن کی کلیوں سے گلستاں کو

اڑایا چٹکیوں میں میرے ذرے نے بیاباں کو

مرے قطرے نے پانی کر دیا ہر موج طوفاں کو

مری کشتی بھنور سے کھیلنے کا شوق رکھتی ہے

یہ کس نے کر دیا خاموش یا رب موج طوفاں کو

یہ کیا نغمہ تھا چھیڑا جو یکایک قلب مضطر نے

کہ میری نے نے رقصاں کر دیا سارے گلستاں کو

میں ہوں وہ قطرۂ شبنم کہ چمکا تیرے پرتو سے

لگی ہیں کھینچنے کرنیں مری مہر درخشاں کو

مرے ذوق فنا پر زندگی ہے خضر کی قرباں

مرے تلخانۂ غم میں ڈبو دو آب حیواں کو

کلیم طور معنی ہوں ید بیضا ہے میرا دل

منور کر دیا جس نے مرے چاک گریباں کو

gareban se tire kis ne nikala subh-e-khandan ko

kiya kis ne nihan daman ki kaliyon se gulistan ko

uraya chutkiyon mein mere zarre ne bayaban ko

mire qatre ne pani kar diya har mauj-e-tufan ko

miri kashti bhanwar se khelne ka shauq rakhti hai

ye kis ne kar diya khamosh ya rab mauj-e-tufan ko

ye kya naghma tha chhera jo yakayak qalb-e-muztar ne

ke meri ne ne raqsan kar diya sare gulistan ko

main hun wo qatra-e-shabnam ke chamka tere partau se

lagi hain khinchne kirnen miri mehr-e-darakhshan ko

mire zauq-e-fana par zindagi hai khizr ki qurban

mire talkhana-e-gham mein dubo do ab-e-haiwan ko

kalim-e-tur maani hun yad-e-baiza hai mera dil

munawwar kar diya jis ne mire chak-e-gareban ko