Arooz is now on the App Store, for iPhone and iPad. Download →

All poetry

جانے والے نہ ہم اس کوچے میں آنے والے

Riyaz Khairabadi (1853–1934)

جانے والے نہ ہم اس کوچے میں آنے والے

اچھے آئے ہمیں دیوانہ بنانے والے

تو سلامت رہے دل میں اتر آنے والے

ترے صدقے مری آنکھوں میں سمانے والے

ایک ہم لاکھ حسینوں سے عوض لینے کو

ایک دل لاکھ حسیں دل کے ستانے والے

جب ملے خضر ملے ہم سے اسی وضع کے ساتھ

ہائے کیا لوگ ہیں یہ اگلے زمانے والے

تیر مژگاں میں چھدے کب جگر و دل دیکھے

تیری ناوک تو ہیں بے پر کی اڑانے والے

بن گیا میرے لئے حشر کا دن وصل کی رات

مل گئے آج مجھے میرے ستانے والے

نگہ ناز ادھر ہے نگہ شوق ادھر

ہم تو بجلی کو ہیں بجلی سے لڑانے والے

باندھ دے گی یہ حنا ہاتھ جو رحم آئے گا

کیا بجھائیں گے لگی آگ بجھانے والے

بار عصیاں سے مرے ساتھ پسے اور بھی چار

دب گئے ہائے جنازے کے اٹھانے والے

ساتھ صحبت کے وہ سب حرف و حکایات کئے

سننے والے ہیں نہ افسانے سنانے والے

کم سنی پر ترس آیا نہ شب وصل ریاضؔ

اف رے بے درد حسینوں کے ستانے والے