Arooz is now on the App Store, for iPhone and iPad. Download →

All poetry

کیوں نہ جہاں میں ہو عیاں عیب و ہنر الگ الگ

Dagh Dehlvi (1831–1905)

کیوں نہ جہاں میں ہو عیاں عیب و ہنر الگ الگ

دیکھتے ہیں بہ چشم غور اہل نظر الگ الگ

راہ میں ان کو وہم تھا کوئی نہ بد گمان ہو

آئے تو ساتھ ساتھ وہ مجھ سے مگر الگ الگ

کس کا یقین کیجیے کس کا یقیں نہ کیجیے

لائے ہیں اس کی بزم سے یار خبر الگ الگ

میں ہوں ادھر تو وہ ادھر میں ہوں یہاں تو وہ وہاں

رہتے ہیں مجھ سے دور دور آٹھ پہر الگ الگ

رنج فراق یار بھی صدمۂ روزگار بھی

ایک دل اور اتنے غم چاہئے گھر الگ الگ

ان کو یہ وہم ہے کہیں ایک سے ایک مل نہ جائیں

لوگ بہت ہیں بزم میں سب ہیں مگر الگ الگ

حشر کو اس نے چن لئے داغؔ گناہ گار عشق

تاڑ گئی ہزار میں اس کی نظر الگ الگ