گالی سہی ادا سہی چین جبیں سہی — انشاء اللہ خان انشا (Insha Allah Khan Insha)

گالی سہی ادا سہی چین جبیں سہی

یہ سب سہی پر ایک نہیں کی نہیں سہی

مرنا مرا جو چاہے تو لگ جا گلے سے ٹک

اٹکا ہے دم مرا یہ دم واپسیں سہی

گر نازنیں کے کہنے سے مانا برا ہو کچھ

میری طرف کو دیکھیے میں نازنیں سہی

کچھ پڑ گیا ہے آنکھ میں رونا کہے ہے تو

کیوں میں عبث کو بحثوں یہی دل نشیں سہی

آگے بڑھے جو جاتے ہو کیوں کون ہے یہاں

جو بات ہم کو کہنی ہے تم سے یہیں سہی

منظور دوستی جو تمہیں ہے ہر ایک سے

اچھا تو کیا مضایقہ انشاؔ سے کیں سہی