جان و دل سیں میں گرفتار ہوں کن کا ان کا

جان و دل سیں میں گرفتار ہوں کن کا ان کا

بندۂ بے زر و دینار ہوں کن کا ان کا

صبر کے باغ کے منڈوے سے جھڑا ہوں جیوں پھول

اب تو لاچار گلے ہار ہوں کن کا ان کا

حوض کوثر کی نہیں چاہ زنخداں کی قسم

تشنۂ شربت دیدار ہوں کن کا ان کا

لب و رخسار کے گلقند سیں لازم ہے علاج

دل کے آزار سیں بیمار ہوں کن کا ان کا

مدتیں ہوئیں کہ ہوا خانۂ زنجیر خراب

بستۂ زلف گرہ دار ہوں کن کا ان کا

تشنۂ مرگ کوں ہے آب صراحی دم تیغ

بسمل ابروئے خم دار ہوں کن کا ان کا

ناحق اس سنگ دلی سیں مجھے دیتے ہیں شکست

میں تو آئینۂ سرکار ہوں کن کا ان کا

گلشن وصل میں رہتا ہوں غزل خوان فراق

عندلیب گل رخسار ہوں کن کا ان کا

میں کہا رحم پتنگوں پہ کر اے جان سراجؔ

تب کہا شمع شب تار ہوں کن کا ان کا

jan-o-dil sin mein giraftar hun kin ka un ka

banda-e-be zar-o-dinar hun kin ka un ka

sabr ke bagh ke mandwe se jhara hun jyun phul

ab to lachar gale har hun kin ka un ka

hauz-e-kausar ki nahin chah-e-zanakhdan ki qasam

tishna-e-sharbat-e-didar hun kin ka un ka

lab-o-rukhsar ke gulqand sin lazim hai ilaj

dil ke azar sin bimar hun kin ka un ka

muddaten huin ke hua khana-e-zanjir kharab

basta-e-zulf-e-girah dar hun kin ka un ka

tishna-e-marg kun hai ab surahi dam-e-tegh

bismil abru-e-kham dar hun kin ka un ka

nahaq is sang dili sin mujhe dete hain shikast

main to aina-e-sarkar hun kin ka un ka

gulshan-e-wasl mein rahta hun ghazal khwan-e-firaq

andalib-e-gul-e-rukhsar hun kin ka un ka

main kaha rahm patangon pe kar ai jan siraj

tab kaha sham-e-shab-e-tar hun kin ka un ka