جاناں پہ جی نثار ہوا کیا بجا ہوا

جاناں پہ جی نثار ہوا کیا بجا ہوا

اس راہ میں غبار ہوا کیا بجا ہوا

مدت سے راز عشق مرے پہ عیاں نہ تھا

یہ بھید آشکار ہوا کیا بجا ہوا

تازے کھلے ہیں داغ کے گل دل کے باغ میں

پھر موسم بہار ہوا کیا بجا ہوا

دل تجھ پری کی آگ میں سیماب کی مثال

آخر کوں بے قرار ہوا کیا بجا ہوا

کشور میں دل کے تھا عمل صوبہ دار عیش

اب غم کا اختیار ہوا کیا بجا ہوا

آہوئے دل کہ وحشی صحرائے عقل تھا

تجھ زلف کا شکار ہوا کیا بجا ہوا

وو آفتاب آج مرے قتل پر سراجؔ

شب دیز پر سوار ہوا کیا بجا ہوا

janan pe ji nisar hua kya baja hua

is rah mein ghubar hua kya baja hua

muddat se raz-e-ishq mire pe ayan na tha

ye bhed ashkar hua kya baja hua

taze khule hain dagh ke gul dil ke bagh mein

phir mausam-e-bahar hua kya baja hua

dil tujh pari ki ag mein simab ki misal

akhir kun be qarar hua kya baja hua

kishwar mein dil ke tha amal-e-suba dar-e-aish

ab gham ka ikhtiyar hua kya baja hua

ahu-e-dil ke wahshi-e-sahra-e-aql tha

tujh zulf ka shikar hua kya baja hua

wo aftab aj mire qatl par siraj

shab dez par sawar hua kya baja hua