کیسے چھپاؤں رازِ غم، دیدۂ تر کو کیا کروں

کیسے چھپاؤں رازِ غم، دیدۂ تر کو کیا کروں

دل کی تپش کو کیا کروں، سوزِ جگر کو کیا کروں

غیر ہے گرچہ ہمنشیں، بزم میں ہے تو وہ حسیں

پھر مجھے لے چلا وہیں، ذوقِ نظر کو کیا کروں

شورشِ‌ عاشقی کہاں، اور مری سادگی کہاں

حُسن کو تیرے کیا کہوں، اپنی نظر کو کیا کروں

غم کا نہ دل میں‌ ہو گزر، وصل کی شب ہو یوں بسر

سب یہ قبول ہے مگر، خوفِ سحر کو کیا کروں

حال میرا تھا جب بتر، تب نہ ہوئی تمہیں خبر

بعد مرے ہوا اثر، اب میں‌ اثر کو کیا کروں

دل کی ہوس مٹا تو دی، ان کی جھلک دکھا تو دی

پر یہ کہو کہ شوق کی “بارِ دگر” کو کیا کروں

حسرتِ نغز گو ترا، کوئی نہ قدرداں ملا

اب یہ بتا کہ میں ترے ، عرضِ ہنر کو کیا کروں

kaise chhupaun raz-e-gham, dida-e-tar ko kya karun

dil ki tapish ko kya karun, soz-e-jigar ko kya karun

ghair hai garche hamnashin, bazm mein hai to wo hasin

phir mujhe le chala wahin, zauq-e-nazar ko kya karun

shorish-e-ashiqi kahan, aur miri sadgi kahan

husn ko tere kya kahun, apni nazar ko kya karun

gham ka na dil mein ho guzar, wasl ki shab ho yun basar

sab ye qubul hai magar, khauf-e-sahar ko kya karun

hal mera tha jab bittar, tab na hui tumhen khabar

baad mire hua asar, ab main asar ko kya karun

dil ki hawas mita to di, un ki jhalak dikha to di

par ye kaho ke shauq ki "bar-e-digar" ko kya karun

hasrat-e-naghz go tira, koi na qadardan mila

ab ye bata ke main tire, arz-e-hunar ko kya karun