کیا کیا فریب دل کو دیے اضطراب میں

کیا کیا فریب دل کو دیے اضطراب میں

ان کی طرف سے آپ لکھے خط جواب میں

کیا جانیں کیا سکھائیں گے ان کو صلاح کار

ہر روز گفتگو ہے نئی میرے باب میں

پیر مغاں کی دل شکنی کا رہا خیال

داخل ہوا ہوں توبہ سے پہلے ثواب میں

رکھنا قدم تصور جاناں سنبھال کر

کائی ہے جا بہ جا مری چشم پر آب میں

اے شیخ جو بتائے مے عشق کو حرام

ایسے کے دو لگائے بھگو کر شراب میں

اے داغؔ کوئی مجھ سا نہ ہوگا گناہ گار

ہے معصیت سے میری جہنم عذاب میں

kya kya fareb-e-dil ko diye iztirab mein

un ki taraf se ap likhe khat jawab mein

kya janen kya sikhaenge un ko salah-e-kar

har roz guftugu hai nai mere bab mein

pir-e-mughan ki dil shikani ka raha khayal

dakhil hua hun tauba se pahle sawab mein

rakhna qadam tasawwur janan sambhal kar

kai hai ja ba ja miri chashm par ab mein

ai shaikh jo batae mai ishq ko haram

aise ke do lagae bhigo kar sharab mein

ai dagh koi mujh sa na hoga gunah gar

hai maasiyat se meri jahannam azab mein