کیا کہیں پوچھ مت کہیں ہیں ہم

کیا کہیں پوچھ مت کہیں ہیں ہم

تو جہاں ہے غرض وہیں ہیں ہم

کیا کہیں اپنا ہم نشیب و فراز

آسماں گاہ گہ زمیں ہیں ہم

وہم میں اپنے تھے بہت کچھ لیک

خوب دیکھا تو کچھ نہیں ہیں ہم

ہم کو ناکارہ جان مت لے لے

تیرے ہی نام کے نگیں ہیں ہم

میں جو پوچھا کہاں ہو تم تو کہا

تجھ کو کیا کام ہے کہیں ہیں ہم

اپنے عقدے کسی طرح نہ کھلے

کس دل آزار کی جبیں ہیں ہم

ہم نہ تیر شہاب ہیں نہ سموم

نالہ و آہ آتشیں ہیں ہم

بود و نابود میں غرض اپنے

جس طرح سے کہ ہم نشیں ہیں ہم

کیا کہیں پوچھ مت بقول ضیاؔ

ایک دم ہیں سو واپسیں ہیں ہم

kya kahen puchh mat kahin hain ham

tu jahan hai gharaz wahin hain ham

kya kahen apna ham nasheb-o-faraz

asman gah gah zamin hain ham

wahm main apne the bahut kuchh lek

khub dekha to kuchh nahin hain ham

ham ko nakara jan mat le le

tere hi nam ke nagin hain ham

main jo puchha kahan ho tum to kaha

tujh ko kya kam hai kahin hain ham

apne uqde kisi tarah na khule

kis dil azar ki jabin hain ham

ham na tir-e-shahab hain na samum

nala-o-ah atishin hain ham

bud-o-nabud mein gharaz apne

jis tarah se ke ham nashin hain ham

kya kahen puchh mat baqaul ziya

ek dam hain so wapasen hain ham