کیا کہیں دنیا میں ہم انسان یا حیوان تھے

کیا کہیں دنیا میں ہم انسان یا حیوان تھے

خاک تھے کیا تھے غرض اک آن کے مہمان تھے

کر رہے تھے اپنا قبضہ غیر کی املاک پر

غور سے دیکھا تو ہم بھی سخت بے ایمان تھے

اور کی چیزیں دبا رکھنا بڑی سمجھی تھی عقل

چھین لیں جب اس نے جب جانا کہ ہم نادان تھے

ایک دن اک استخواں اوپر پڑا میرا جو پاؤں

کیا کہوں اس دم مجھے غفلت میں کیا کیا دھیان تھے

پاؤں پڑتے ہی غرض اس استخواں نے آہ کی

اور کہا غافل کبھی تو ہم بھی صاحب جان تھے

دست و پا زانو سر و گردن شکم پشت و کمر

دیکھنے کو آنکھیں اور سننے کی خاطر کان تھے

ابرو و بینی جبیں نقش و نگار و خال و خط

لعل و مروارید سے بہتر لب و دندان تھے

رات کو سونے کو کیا کیا نرم و نازک تھے پلنگ

بیٹھنے کو دن کے کیا کیا کوٹھے اور دالان تھے

کھل رہا تھا روبرو جنت کے گلشن کا چمن

نازنین محبوب گویا حور اور غلمان تھے

لگ رہا تھا دل کئی چنچل پری زادوں کے ساتھ

کچھ کسی سے عہد تھے اور کچھ کہیں پیمان تھے

گل بدن اور گلعذاروں کے کنارو بوس سے

کچھ نکالی تھی ہوس کچھ اور بھی ارمان تھے

مچ رہے تھے چہچہے اور اڑ رہے تھے قہقہے

ساقی و ساغر صراحی پھول عطر و پان تھے

ایک ہی چکر دیا ایسا اجل نے آن کر

جو نہ ہم تھے اور نہ وہ سب عیش کے سامان تھے

ایسی بے دردی سے ہم پر پاؤں مت رکھ اے نظیرؔ

او میاں تیری طرح ہم بھی کبھی انسان تھے

kya kahen duniya mein ham insan ya haiwan the

khak the kya the gharaz ik an ke mehman the

kar rahe the apna qabza ghair ki amlak par

ghaur se dekha to ham bhi sakht be iman the

aur ki chizen daba rakhna bari samjhi thi aql

chhin len jab us ne jab jana ke ham nadan the

ek din ik ustukhwan upar para mera jo paon

kya kahun is dam mujhe ghaflat mein kya kya dhyan the

paon parte hi gharaz is ustukhwan ne ah ki

aur kaha ghafil kabhi to ham bhi sahab jan the

dast-o-pa zanu sar-o-gardan shikam pusht-o-kamar

dekhne ko ankhen aur sunne ki khatir kan the

abru-o-bini jabin naqsh-o-nigar-o-khal-o-khat

laal-o-marwarid se behtar lab-o-dandan the

rat ko sone ko kya kya narm-o-nazuk the palang

baithne ko din ke kya kya kothe aur dalan the

khul raha tha rubaru jannat ke gulshan ka chaman

naznin mahbub goya hur aur ghilman the

lag raha tha dil kai chanchal pari zadon ke sath

kuchh kisi se ahd the aur kuchh kahin paiman the

gul badan aur gulizaron ke kanaro bos se

kuchh nikali thi hawas kuchh aur bhi arman the

much rahe the chahchahe aur ur rahe the qahqahe

saqi-o-saghar surahi phul itr-o-pan the

ek hi chakkar diya aisa ajal ne an kar

jo na ham the aur na wo sab aish ke saman the

aisi be dardi se ham par paon mat rakh ai nazir

o miyan teri tarah ham bhi kabhi insan the