کیا چاک‌ کیا تو نے مری جاں مرے دل کو

کیا چاک‌ کیا تو نے مری جاں مرے دل کو

میرا ہی بنایا ہے گریباں مرے دل کو

تجھ کو ہے قسم درد محبت مرے دل کی

تو چین نہ دینا کسی عنواں مرے دل کو

یا اس بت گمراہ کو لا راہ وفا پر

یا پھیر دے اے گردش دوراں مرے دل کو

اچھی کہی اچھا نہیں کچھ دل کا لگانا

یہ لگ گئی اے ناصح ناداں مرے دل کو

تاثیر دکھا جائے محبت تو عجب کیا

سینے سے لگا آج مری جاں مرے دل کو

کچھ دور نہیں بت کدہ و کعبہ سمجھ لیں

کافر تری آنکھوں کو مسلماں مرے دل کو

ہے لطف تو یہ تجھ کو ہو محشر میں بھی انکار

اور داغؔ کہے تو نے لیا ہاں مرے دل کو

kya chak kiya tu ne miri jan mire dil ko

mera hi banaya hai gareban mire dil ko

tujh ko hai qasam dard-e-mohabbat mire dil ki

tu chain na dena kisi unwan mire dil ko

ya us but gumrah ko la rah wafa par

ya pher de ai gardish-e-dauran mire dil ko

achchhi kahi achchha nahin kuchh dil ka lagana

ye lag gai ai naseh-e-nadan mire dil ko

tasir dikha jae mohabbat to ajab kya

sine se laga aj miri jan mire dil ko

kuchh dur nahin but kada-o-kaaba samajh len

kafir tiri ankhon ko musalman mire dil ko

hai lutf to ye tujh ko ho mahshar mein bhi inkar

aur dagh kahe tu ne liya han mire dil ko