کیا ملا ہم کو تیری یاری میں

کیا ملا ہم کو تیری یاری میں

رہے اب تک امیدواری میں

ہاتھ گہرا لگا کوئے قاتل

زور لذت ہے زخم کاری میں

دل جو بے خود ہوا صبا لائی

کس کی بو نگہت بہاری میں

ٹک ادھر دیکھ تو بھلا اے چشم

فائدہ ایسی اشک باری میں

چٹ لگا دیتے ہیں مرے آنسو

سلک گوہر کے آب داری میں

روٹھ کر اس سے میں جو کل بھاگا

ناگہاں دل کی بے قراری میں

آ لیا اس نے دوڑ کر مجھ کو

تاک کے اوچھل ایک کیاری میں

یوں لگا کہنے بس دوانہ نہ بن

پاؤں رکھ اپنا ہوشیاری میں

کب تلک میں بھلا رہوں شب و روز

تیری ایسی مزاج داری میں

ہے سمایا ہوا جو لڑکا پن

آپ کی وضع پیاری پیاری میں

اپنی بکری کا منہ چڑاتے وقت

کیا خوش آتی ہے یہ تمہاری میں

بندۂ بو تراب ہے انشاؔ

شک نہیں اس کی خاکساری میں

kya mila ham ko teri yari mein

rahe ab tak umidwari mein

hath gahra laga ku-e-qatil

zor lazzat hai zakhm-e-kari mein

dil jo be khud hua saba lai

kis ki bu nighat-e-bahari mein

tuk idhar dekh to bhala ai chashm

faida aisi ashk bari mein

chat laga dete hain mire ansu

silk gauhar ke ab dari mein

ruth kar us se main jo kal bhaga

nagahan dil ki be qarari mein

a liya us ne daur kar mujh ko

tak ke ochhal ek kiyari mein

yun laga kahne bas diwana na ban

paon rakh apna hoshyari mein

kab talak mein bhala rahun shab-o-roz

teri aisi mizaj dari mein

hai samaya hua jo larka pan

ap ki waza pyari pyari mein

apni bakri ka munh chirate waqt

kya khush ati hai ye tumhari mein

banda-e-bu turab hai insha

shak nahin us ki khaksari mein