کیا آ کے جہاں میں کر گئے ہم

کیا آ کے جہاں میں کر گئے ہم

اک داغ جگر پہ دھر گئے ہم

مہمان جہاں تھے ایک شب کے

شام آئے تھے اور سحر گئے ہم

جوں شمع تمام عمر روئے

ہر بزم سے چشم تر گئے ہم

اپنی ہی نظر نہیں وگرنہ

تو ہی تھا ادھر جدھر گئے ہم

نالے میں اثر تو کیوں نہ ہوتا

پر تیرا لحاظ کر گئے ہم

ہم جانتے ہیں کہ تو ہے ہم میں

گو ڈھونڈنے در بہ در گئے ہم

جھگڑا تھا جو دل پہ اس کو چھوڑا

کچھ سوچ کے صلح کر گئے ہم

اس دشت کے خار و خس سے بچ کر

جوں باد سبک گزر گئے ہم

تھیں لطف سے دل میں جرأتیں کچھ

پر تیرے غضب سے ڈر گئے ہم

حسرت ہی سے ہم بنے تھے گویا

آنکھ اٹھتے ہی اٹھتے مر گئے ہم

دیرینہ رفیق تھا قلقؔ ہائے

وہ کیا ہی موا کہ مر گئے ہم

kya a ke jahan mein kar gae ham

ik dagh-e-jigar pe dhar gae ham

mehman jahan the ek shab ke

sham ae the aur sahar gae ham

jun shama tamam umr roe

har bazm se chashm-e-tar gae ham

apni hi nazar nahin wagarna

tu hi tha idhar jidhar gae ham

nale mein asar to kyun na hota

par tera lihaz kar gae ham

ham jante hain ke tu hai ham mein

go dhundne dar ba dar gae ham

jhagra tha jo dil pe us ko chhora

kuchh soch ke sulh kar gae ham

is dasht ke khar-o-khas se bach kar

jun bad subuk guzar gae ham

thin lutf se dil mein juraten kuchh

par tere ghazab se dar gae ham

hasrat hi se ham bane the goya

ankh uthte hi uthte mar gae ham

derina rafiq tha qalaq hae

wo kya hi mua ke mar gae ham