کیا آئے تم جو آئے گھڑی دو گھڑی کے بعد

کیا آئے تم جو آئے گھڑی دو گھڑی کے بعد

سینے میں ہوگی سانس اڑی دو گھڑی کے بعد

کیا روکا اپنے گریے کو ہم نے کہ لگ گئی

پھر وہ ہی آنسوؤں کی جھڑی دو گھڑی کے بعد

کوئی گھڑی اگر وہ ملایم ہوئے تو کیا

کہہ بیٹھیں گے پھر ایک کڑی دو گھڑی کے بعد

اس لعل لب کے ہم نے لیے بوسے اس قدر

سب اڑ گئی مسی کی دھڑی دو گھڑی کے بعد

اللہ رے ضعف سینہ سے ہر آہ بے اثر

لب تک جو پہنچی بھی تو چڑھی دو گھڑی کے بعد

کل اس سے ہم نے ترک ملاقات کی تو کیا

پھر اس بغیر کل نہ پڑی دو گھڑی کے بعد

تھے دو گھڑی سے شیخ جی شیخی بگھارتے

ساری وہ شیخی ان کی جھڑی دو گھڑی کے بعد

کہتا رہا کچھ اس سے عدو دو گھڑی تلک

غماز نے پھر اور جڑی دو گھڑی کے بعد

پروانہ گرد شمع کے شب دو گھڑی رہا

پھر دیکھی اس کی خاک پڑی دو گھڑی کے بعد

تو دو گھڑی کا وعدہ نہ کر دیکھ جلد آ

آنے میں ہوگی دیر بڑی دو گھڑی کے بعد

گو دو گھڑی تک اس نے نہ دیکھا ادھر تو کیا

آخر ہمیں سے آنکھ لڑی دو گھڑی کے بعد

کیا جانے دو گھڑی وہ رہے ذوقؔ کس طرح

پھر تو نہ ٹھہرے پاؤں گھڑی دو گھڑی کے بعد

kya ae tum jo ae ghari do ghari ke baad

sine mein hogi sans uri do ghari ke baad

kya roka apne giriye ko ham ne ke lag gai

phir wo hi ansuon ki jhari do ghari ke baad

koi ghari agar wo milaim hue to kya

kah baithenge phir ek kari do ghari ke baad

is laal-e-lab ke ham ne liye bose is qadar

sab ur gai missi ki dhari do ghari ke baad

allah re zof sina se har ah be asar

lab tak jo pahunchi bhi to charhi do ghari ke baad

kal us se ham ne tark-e-mulaqat ki to kya

phir is baghair kal na pari do ghari ke baad

the do ghari se shaikh ji shekhi bagharte

sari wo shekhi un ki jhari do ghari ke baad

kahta raha kuchh us se adu do ghari talak

ghammaz ne phir aur juri do ghari ke baad

parwana gard-e-shama ke shab do ghari raha

phir dekhi us ki khak pari do ghari ke baad

tu do ghari ka waada na kar dekh jald a

ane mein hogi der bari do ghari ke baad

go do ghari tak us ne na dekha idhar to kya

akhir hamen se ankh lari do ghari ke baad

kya jane do ghari wo rahe zauq kis tarah

phir to na thahre paon ghari do ghari ke baad