کہنے بھی کچھ نہ پائے تھے آہ رسا سے ہم

کہنے بھی کچھ نہ پائے تھے آہ رسا سے ہم

سننا پڑا کہ آج لڑیں گے ہوا سے ہم

ضد آپ کو اثر سے اثر کو دعا سے لاگ

فرمائیے تو ہاتھ اٹھا لیں دعا سے ہم

پیسیں کسے یہ کہتے ہیں فتنے دم خرام

اتنی بڑے حضور قیامت ذرا سے ہم

محشر میں پائی جام بکف حور زاہدو

اچھے رہے یہاں بھی تمہاری دعا سے ہم

سوتے میں کام آئی نہ کچھ چشم نیم باز

کھل کھیلے آج یار کے بند قبا سے ہم

ہم جانتے ہیں خوب اداؤں کی شوخیاں

ہم ہیں ادا شناس ڈریں کیا قضا سے ہم

اٹھ جائے بار شرم تو سو فتنے ہم اٹھائیں

کہتی ہے وہ نگاہ دبے ہیں حیا سے ہم

حوروں کے بدلے ہوں بت کافر ہمیں نصیب

تم کو اگر ستائیں تو پائیں خدا سے ہم

کرتے نہ ہم وفا تو نہ بڑھتے جفا و جور

شرمندہ وہ جفا سے تو اپنی دعا سے ہم

ممکن ہے جا کے عرصۂ محشر میں سر اٹھائیں

تیری گلی میں دب کے رہے نقش پا سے ہم

ان کے لئے مزے کی سزا ہے یہی ریاضؔ

محشر میں مانگ لیں گے بتوں کو خدا سے ہم

kahne bhi kuchh na pae the ah-e-rasa se ham

sunna para ke aj larenge hawa se ham

zid ap ko asar se asar ko dua se lag

farmaiye to hath utha len dua se ham

pisen kise ye kahte hain fitne dam-e-khiram

itni bare huzur qayamat zara se ham

mahshar mein pai jam bakaf hur-e-zahido

achchhe rahe yahan bhi tumhari dua se ham

sote mein kam ai na kuchh chashm-e-nim baz

khul khele aj yar ke band-e-qaba se ham

ham jante hain khub adaon ki shokhiyan

ham hain ada shanas daren kya qaza se ham

uth jae bar sharm to so fitne ham uthaen

kahti hai wo nigah dabe hain haya se ham

huron ke badle hun but-e-kafir hamen nasib

tum ko agar sataen to paen khuda se ham

karte na ham wafa to na barhte jafa-o-jaur

sharminda wo jafa se to apni dua se ham

mumkin hai ja ke arsa-e-mahshar mein sar uthaen

teri gali mein dab ke rahe naqsh-e-pa se ham

un ke liye maze ki saza hai yahi riyaz

mahshar mein mang lenge buton ko khuda se ham