کہوں کیا آرزوئے بے دلی مُجھ کو کہاں تک ہے

کہوں کیا آرزوئے بے دلی مُجھ کو کہاں تک ہے

مرے بازار کی رونق ہی سودائے زیاں تک ہے

وہ مے کش ہوں فروغِ مے سے خود گُلزار بن جاؤں

ہوائے گُل فراقِ ساقیِ نا مہرباں تک ہے

چمن افروز ہے صیّاد میری خوش‌نوائی تک

رہی بجلی کی بے تابی، سو میرے آشیاں تک ہے

وہ مُشتِ خاک ہوں، فیضِ پریشانی سے صحرا ہوں

نہ پُوچھو میری وسعت کی، زمیں سے آ سماں تک ہے

جرَس ہوں، نالہ خوابیدہ ہے میرے ہر رگ و پے میں

یہ خاموشی مری وقتِ رحیلِ کارواں تک ہے

سکُونِ دل سے سامانِ کشودِ کار پیدا کر

کہ عقدہ خاطرِ گرداب کا آبِ رواں تک ہے

چمن زارِ محبّت میں خموشی موت ہے بُلبل!

یہاں کی زندگی پابندیِ رسمِ فغاں تک ہے

جوانی ہے تو ذوقِ دید بھی، لُطفِ تمنّا بھی

ہمارے گھر کی آبادی قیامِ میہماں تک ہے

زمانے بھر میں رُسوا ہوں مگر اے وائے نادانی!

سمجھتا ہوں کہ میرا عشق میرے رازداں تک ہے

kahun kya arzue be dili mujh ko kahan tak hai

mire bazar ki raunaq hi sauda-e-ziyan tak hai

wo mai kash hun farogh-e-mai se khud gulzar ban jaun

hawa-e-gul firaq-e-saqi-e-na mehrban tak hai

chaman afroz hai sayyad meri khushnawai tak

rahi bijli ki be tabi, so mere ashiyan tak hai

wo musht-e-khak hun, faiz-e-pareshani se sahra hun

na puchho meri wusat ki, zamin se a saman tak hai

jaras hun, nala khwabida hai mere har rag-o-pe mein

ye khamoshi miri waqt-e-rahil-e-karwan tak hai

sukun-e-dil se saman-e-kashud-e-kar paida kar

ke uqda khatir-e-girdab ka ab-e-rawan tak hai

chaman zar-e-mohabbat mein khamoshi maut hai bulbul!

yahan ki zindagi pabandi-e-rasm-e-fughan tak hai

jawani hai to zauq-e-did bhi, lutf-e-tamanna bhi

hamare ghar ki abadi qayam-e-mehman tak hai

zamane bhar mein ruswa hun magar ai wae nadani!

samajhta hun ke mera ishq mere razdan tak hai