کھوئے ہوئے زمانے

کیوں یاد آ رہے ہیں بھولے ہوئے فسانے

گزری ہوئی بہاریں کھوئے ہوئے زمانے

یا ایک برگ گل کو آنکھیں ترس رہی ہیں

یا اپنے دامنوں میں پھولوں کے تھے خزانے

یا آج خاک و صرصر ہیں ان کی وجہ زینت

یا تھے یہی گلستاں کل تک نگار خانے

یا آج خار و خس بھی ہم کو نہیں میسر

یا تھے کبھی گلوں کے جھرمٹ میں آشیانے

اب تک وہی صدائیں کانوں میں آ رہی ہیں

وہ چہچہے وہ نغمے وہ راگ وہ ترانے

ہے یاد ہم صفیرو تم کو وہ عہد اپنا

بجتے تھے جب خوشی کے ہر وقت شادیانے

جب تھیں مسرتوں کی لہریں ہر ایک دل میں

ہر وقت ڈھونڈھتے تھے تفریح کے بہانے

حسن و شباب کے وہ پر کیف عہد زریں

وہ عشق و عاشقی کے دلچسپ کارخانے

وہ جشن عیش و راحت وہ ساز لطف و عشرت

آنکھوں میں پھر رہے ہیں اب تک وہی زمانے

ناداں سمجھ کے ہم کو صیاد نے چمن میں

دام ہوس بچھا کر ڈالے وہ چند دانے

جن کے لئے ہم اب تک پچھتا رہے ہیں ہمدم

کنج قفس کے اندر کھا کھا کے تازیانے

kyun yad a rahe hain bhule hue fasane

guzri hui baharen khoe hue zamane

ya ek barg-e-gul ko ankhen taras rahi hain

ya apne damanon mein phulon ke the khazane

ya aj khak-o-sarsar hain un ki wajh zinat

ya the yahi gulistan kal tak nigar khane

ya aj khar-o-khas bhi ham ko nahin muyassar

ya the kabhi gulon ke jhurmut mein ashiyane

ab tak wahi sadaen kanon mein a rahi hain

wo chahchahe wo naghme wo rag wo tarane

hai yad ham safiro tum ko wo ahd apna

bajte the jab khushi ke har waqt shadiyane

jab thin masarraton ki lahren har ek dil mein

har waqt dhundhte the tafrih ke bahane

husn-o-shabab ke wo pur kaif ahd-e-zarrin

wo ishq-o-ashiqi ke dilchasp karkhane

wo jashn-e-aish-o-rahat wo saz lutf-o-ishrat

ankhon mein phir rahe hain ab tak wahi zamane

nadan samajh ke ham ko sayyad ne chaman mein

dam-e-hawas bichha kar dale wo chand dane

jin ke liye ham ab tak puchhta rahe hain hamdam

kunj-e-qafas ke andar kha kha ke taziyane