کھٹکتے ہیں نگاہ باغباں میں

کھٹکتے ہیں نگاہ باغباں میں

جو ہیں دو چار تنکے آشیاں میں

ہر اک سختی میں عالم نزع کا تھا

ہماری عمر گزری امتحاں میں

چھڑا لے سجدہ کرنے میں نہ کوئی

لگے ہیں لال سنگ آستاں میں

شرارے ہیں مرے نالوں کے قائم

کہ تارے جڑ دیے ہیں آسماں میں

قریب اب فصل گل شاید ہے صیاد

مزا آنے لگا میری فغاں میں

ترس آتا نہیں مجھ پر کسی کو

میں فریاد جرس ہوں کارواں میں

اثر مے کا ہے یا توبہ کا ناصح

کہ تلخی سی ہے کچھ اب تک زباں میں

تڑپنے والوں میں بھی تفرقہ ہے

قفس میں ہم ہیں بجلی آشیاں میں

کسی سے چھوٹ کر عالم ہے کچھ اور

پڑا ہے تفرقہ سا جسم و جاں میں

ریاضؔ استاد نے رتبہ یہ بخشا

ہماری دھوم ہے ہندوستاں میں

khatakte hain nigah-e-baghban mein

jo hain do char tinke ashiyan mein

har ik sakhti mein alam-e-nazaa ka tha

hamari umr guzri imtihan mein

chhura le sajda karne mein na koi

lage hain lal sang-e-astan mein

sharare hain mire nalon ke qaim

ke tare jur diye hain asman mein

qarib ab fasl-e-gul shayad hai sayyad

maza ane laga meri fughan mein

taras ata nahin mujh par kisi ko

main fariyad-e-jaras hun karwan mein

asar mai ka hai ya tauba ka naseh

ke talkhi si hai kuchh ab tak zaban mein

tarapne walon mein bhi tafriqa hai

qafas mein ham hain bijli ashiyan mein

kisi se chhut kar alam hai kuchh aur

para hai tafriqa sa jism-o-jan mein

riyaz-e-ustad ne rutba ye bakhsha

hamari dhum hai hindostan mein