کچھ بات ہی تھی ایسی کہ تھامے جگر گئے

کچھ بات ہی تھی ایسی کہ تھامے جگر گئے

ہم اور جاتے بزم عدو میں مگر گئے

یہ تو خبر نہیں کہ کہاں اور کدھر گئے

لیکن یہاں سے دور کچھ اہل سفر گئے

ارماں جو ہم نے جمع کئے تھے شباب میں

پیری میں وہ خدا کو خبر ہے کدھر گئے

رتبہ بلند ہے مرے داغوں کا اس قدر

میں ہوں زمیں پہ داغ مرے تا قمر گئے

رخسار پر ہے رنگ حیا کا فروغ آج

بوسے کا نام میں نے لیا وہ نکھر گئے

دنیا بس اس سے اور زیادہ نہیں ہے کچھ

کچھ روز ہیں گزارنے اور کچھ گزر گئے

جانے لگا ہے دل کی طرف ان کا ہاتھ اب

نالے شب فراق کے کچھ کام کر گئے

حسرت کا یہ مزا ہے کہ نکلے نہیں کبھی

ارماں نہیں ہیں وہ کہ شب آئے سحر گئے

بس ایک ذات حضرت شیداؔ کی ہے یہاں

دہلی سے رفتہ رفتہ سب اہل ہنر گئے

kuchh bat hi thi aisi ke thame jigar gae

ham aur jate bazm-e-adu mein magar gae

ye to khabar nahin ke kahan aur kidhar gae

lekin yahan se dur kuchh ahl-e-safar gae

arman jo ham ne jama kiye the shabab mein

piri mein wo khuda ko khabar hai kidhar gae

rutba buland hai mire daghon ka is qadar

main hun zamin pe dagh mire ta qamar gae

rukhsar par hai rang-e-haya ka farogh aj

bose ka nam main ne liya wo nikhar gae

duniya bas us se aur ziyada nahin hai kuchh

kuchh roz hain guzarne aur kuchh guzar gae

jane laga hai dil ki taraf un ka hath ab

nale shab-e-firaq ke kuchh kam kar gae

hasrat ka ye maza hai ke nikle nahin kabhi

arman nahin hain wo ke shab ae sahar gae

bas ek zat hazrat-e-shaida ki hai yahan

dehli se rafta rafta sab ahl-e-hunar gae