کچھ تو تنہائی کی راتوں میں سہارا ہوتا

کچھ تو تنہائی کی راتوں میں سہارا ہوتا

تم نہ ہوتے نہ سہی ذکر تمہارا ہوتا

ترک دنیا کا یہ دعویٰ ہے فضول اے زاہد

بار ہستی تو ذرا سر سے اتارا ہوتا

وہ اگر آ نہ سکے موت ہی آئی ہوتی

ہجر میں کوئی تو غمخوار ہمارا ہوتا

زندگی کتنی مسرت سے گزرتی یا رب

عیش کی طرح اگر غم بھی گوارا ہوتا

عظمت گریہ کو کوتاہ نظر کیا سمجھیں

اشک اگر اشک نہ ہوتا تو ستارا ہوتا

لب زاہد پہ ہے افسانۂ حور جنت

کاش اس وقت مرا انجمن آرا ہوتا

غم الفت جو نہ ملتا غم ہستی ملتا

کسی صورت تو زمانے میں گزارا ہوتا

کس کو فرصت تھی زمانے کے ستم سہنے کی

گر نہ اس شوخ کی آنکھوں کا اشارا ہوتا

کوئی ہمدرد زمانے میں نہ پایا اخترؔ

دل کو حسرت ہی رہی کوئی ہمارا ہوتا

kuchh to tanhai ki raton mein sahara hota

tum na hote na sahi zikr tumhara hota

tark-e-duniya ka ye daawa hai fuzul ai zahid

bar-e-hasti to zara sar se utara hota

wo agar a na sake maut hi ai hoti

hijr mein koi to ghamkhwar hamara hota

zindagi kitni masarrat se guzarti ya rab

aish ki tarah agar gham bhi gawara hota

azmat girya ko kotah nazar kya samjhen

ashk agar ashk na hota to sitara hota

lab-e-zahid pe hai afsana-e-hur-e-jannat

kash is waqt mira anjuman ara hota

gham-e-ulfat jo na milta gham-e-hasti milta

kisi surat to zamane mein guzara hota

kis ko fursat thi zamane ke sitam sahne ki

gar na us shokh ki ankhon ka ishara hota

koi hamdard zamane mein na paya akhtar

dil ko hasrat hi rahi koi hamara hota