کنج قفس سے پہلے گھر اپنا کہاں نہ تھا — لالہ مادھو رام جوہر (Lala Madhav Ram Jauhar)

کنج قفس سے پہلے گھر اپنا کہاں نہ تھا

آئے یہاں تو حوصلۂ آشیاں نہ تھا

تجھ کو سمجھ کے خواب میں پہنچا میں جس جگہ

دیکھا جو آنکھ کھول کے تو کچھ وہاں نہ تھا

اک اک قدم پہ اب تو قیامت کی دھوم ہے

آگے تو یہ چلن کبھی اے جان جاں نہ تھا

ٹھہری جو وصل کی تو ہوئی صبح شام سے

بت مہرباں ہوئے تو خدا مہرباں نہ تھا

کیونکر قسم پہ آج مجھے اعتبار آئے

کس دن خدا تمہارے مرے درمیاں نہ تھا

توڑا جو پھول بلبل شیدا کے سامنے

کیا تیرے دل میں درد کچھ اے باغباں نہ تھا