Arooz is now on the App Store, for iPhone and iPad. Download →

All poetry

بیکسیٔ شب ہجراں کی مجھے تاب نہیں

Dagh Dehlvi (1831–1905)

بیکسیٔ شب ہجراں کی مجھے تاب نہیں

کاش دشمن ہی چلے آئیں جو احباب نہیں

تجھ کو اے بخت سیہ آگ لگا کر دیکھوں

شب ہجراں میں اگر جلوہ مہتاب نہیں

دیکھ بت خانے میں تصویر کا عالم اے شیخ

یاں مصلیٰ نہیں منبر نہیں محراب نہیں

نامہ بر مجھ سے یہ کہتا ہے کہ تم تو کیا ہو

بادشہ بھی تو وہاں قابل القاب نہیں

نہ ملے مجھ کو مرے حال پہ رونے والے

عیش کیسا کہ یہاں غم کے بھی اسباب نہیں

حال دل جس سے کہا اس نے کہا بس خاموش

داغؔ اس درد کے سننے کی ہمیں تاب نہیں