کمر باندھے ہوئے چلنے کو یاں سب یار بیٹھے ہیں

کمر باندھے ہوئے چلنے کو یاں سب یار بیٹھے ہیں

بہت آگے گئے باقی جو ہیں تیار بیٹھے ہیں

نہ چھیڑ اے نکہت باد بہاری راہ لگ اپنی

تجھے اٹکھیلیاں سوجھی ہیں ہم بے زار بیٹھے ہیں

خیال ان کا پرے ہے عرش اعظم سے کہیں ساقی

غرض کچھ اور دھن میں اس گھڑی مے خوار بیٹھے ہیں

بسان نقش پائے رہرواں کوئے تمنا میں

نہیں اٹھنے کی طاقت کیا کریں لاچار بیٹھے ہیں

یہ اپنی چال ہے افتادگی سے ان دنوں پہروں

نظر آیا جہاں پر سایۂ دیوار بیٹھے ہیں

کہیں ہیں صبر کس کو آہ ننگ و نام ہے کیا شے

غرض رو پیٹ کر ان سب کو ہم یک بار بیٹھے ہیں

کہیں بوسے کی مت جرأت دلا کر بیٹھیو ان سے

ابھی اس حد کو وہ کیفی نہیں ہشیار بیٹھے ہیں

نجیبوں کا عجب کچھ حال ہے اس دور میں یارو

جسے پوچھو یہی کہتے ہیں ہم بے کار بیٹھے ہیں

نئی یہ وضع شرمانے کی سیکھی آج ہے تم نے

ہمارے پاس صاحب ورنہ یوں سو بار بیٹھے ہیں

کہاں گردش فلک کی چین دیتی ہے سنا انشاؔ

غنیمت ہے کہ ہم صورت یہاں دو چار بیٹھے ہیں

kamar bandhe hue chalne ko yan sab yar baithe hain

bahut age gae baqi jo hain tayyar baithe hain

na chher ai nikhat-e-bad-e-bahari rah lag apni

tujhe atkheliyan sujhi hain ham be zar baithe hain

khayal un ka pare hai arsh-e-aazam se kahin saqi

gharaz kuchh aur dhun mein us ghari mai khwar baithe hain

basan-e-naqsh-e-pae rahrawan ku-e-tamanna mein

nahin uthne ki taqat kya karen lachar baithe hain

ye apni chal hai uftadagi se in dinon pahron

nazar aya jahan par saya-e-diwar baithe hain

kahin hain sabr kis ko ah nang-o-nam hai kya shai

gharaz ro pet kar un sab ko ham yak bar baithe hain

kahin bose ki mat jurat dila kar baithiyo un se

abhi is had ko wo kaifi nahin hushyar baithe hain

najibon ka ajab kuchh hal hai is daur mein yaro

jise puchho yahi kahte hain ham be kar baithe hain

nai ye waza sharmane ki sikhi aj hai tum ne

hamare pas sahab warna yun sau bar baithe hain

kahan gardish falak ki chain deti hai suna insha

ghanimat hai ke ham surat yahan do char baithe hain