کمالِ تَرک نہیں آب و گِل سے مہجوری

کمالِ تَرک نہیں آب و گِل سے مہجوری

کمالِ ترک ہے تسخیرِ خاکی و نوری

مَیں ایسے فقر سے اے اہلِ حلقہ باز آیا

تمھارا فقر ہے بے دَولتی و رنجوری

نہ فقر کے لیے موزُوں، نہ سلطنت کے لیے

وہ قوم جس نے گنّوایا متاعِ تیموری

سُنے نہ ساقیِ مہ‌وَش تو اور بھی اچھّا

عیارِ گرمیِ صُحبت ہے حرفِ معذوری

حکیم و عارف و صُوفی، تمام مستِ ظہور

کسے خبر کہ تجلّی ہے عین مستوری

وہ مُلتفت ہوں تو کُنجِ قفَس بھی آزادی

نہ ہوں تو صحنِ چمن بھی مقامِ مجبوری

بُرا نہ مان، ذرا آزما کے دیکھ اسے

فرنگ دل کی خرابی، خرد کی معموری

kamal-e-tark nahin ab-o-gil se mahjuri

kamal-e-tark hai taskhir-e-khaki-o-nuri

main aise faqr se ai ahl-e-halqa baz aya

tumhara faqr hai be daulati-o-ranjuri

na faqr ke liye mauzun, na saltanat ke liye

wo qaum jis ne ganwaya mata-e-timori

sune na saqi-e-mahwash to aur bhi achchha

ayyar-e-garmi-e-sohbat hai harf-e-maazuri

hakim-o-arif-o-sufi, tamam mast-e-zuhur

kise khabar ke tajalli hai ain masturi

wo multafat hun to kunj-e-qafas bhi azadi

na hun to sehn-e-chaman bhi maqam-e-majburi

bura na man, zara azma ke dekh use

farang dil ki kharabi, khirad ki maamuri