بی مینڈکی

بادل اٹھا اور چھا گیا

ساون کا مینہ برسا گیا

جنگل میں جل تھل ہو گیا

نہروں میں پانی آ گیا

اور آ گئیں بی مینڈکی

بچوں نے جب دیکھا انہیں

سبزے پہ لپکے گھیر کر

بی مینڈکی نے جس گھڑی

دیکھا انہیں منہ پھیر کر

گھبرا گئیں بی مینڈکی

بھاگیں کبھی اچھلیں کبھی

دوڑیں کبھی اچکیں کبھی

لپکیں کبھی کودیں کبھی

پھاندیں کبھی پھدکیں کبھی

تنگ آ گئیں بی مینڈکی

سبزے کے اندر چھپ رہیں

جب تھک گئیں اکتا گئیں

بچوں کے ہاتھوں سے مگر

جاتیں کہاں ہاتھ آ گئیں

ہاتھ آ گئیں بی مینڈکی

مردہ بنی تھیں مکر سے

بچے یہ سمجھے مر گئیں

تنگ آ کے ان کے ظلم سے

دنیا سے رحلت کر گئیں

کام آ گئیں بی مینڈکی

پھینکا پکڑ کر ایک نے

بی مینڈکی کو نہر میں

بی مینڈکی نے آپ کو

بہتا جو پایا لہر میں

لہرا گئیں بی مینڈکی

پیاسی جو تھیں کچھ دیر سے

سیروں ہی پانی پی گئیں

پھر لپکیں خشکی کی طرف

بچوں نے دیکھا جی گئیں

اور آ گئیں بی مینڈکی

چپکے سے اک لڑکا بڑھا

اور ہاتھ مارا زور سے

بی مینڈکی کا سر لگا

پتھر کی چبھتی کور سے

مرجھا گئیں بی مینڈکی

بی مینڈکی میں دم نہ تھا

دیکھا جو مٹھی کھول کر

بچوں نے چلا کر کہا

لو اب کے تو سچ مچ سفر

فرما گئیں بی مینڈکی

badal utha aur chha gaya

sawan ka menh barsa gaya

jangal mein jal thal ho gaya

nahron mein pani a gaya

aur a gain bi mendaki

bachchon ne jab dekha unhen

sabze pe lapke gher kar

bi mendaki ne jis ghari

dekha unhen munh pher kar

ghabra gain bi mendaki

bhagen kabhi uchhlen kabhi

dauren kabhi uchken kabhi

lapken kabhi kuden kabhi

phanden kabhi phudken kabhi

tang a gain bi mendaki

sabze ke andar chhup rahen

jab thak gain ukta gain

bachchon ke hathon se magar

jatin kahan hath a gain

hath a gain bi mendaki

murda bani thin makr se

bachche ye samjhe mar gain

tang a ke un ke zulm se

duniya se rehlat kar gain

kam a gain bi mendaki

phenka pakar kar ek ne

bi mendaki ko nahr mein

bi mendaki ne ap ko

bahta jo paya lahr mein

lahra gain bi mendaki

pyasi jo thin kuchh der se

sairon hi pani pi gain

phir lapken khushki ki taraf

bachchon ne dekha ji gain

aur a gain bi mendaki

chupke se ik larka barha

aur hath mara zor se

bi mendaki ka sar laga

patthar ki chubhti kor se

murjha gain bi mendaki

bi mendaki mein dam na tha

dekha jo mutthi khol kar

bachchon ne chala kar kaha

lo ab ke to sach much safar

farma gain bi mendaki