کسی کی نرگس مخمور کچھ کہہ دے اشاروں میں

کسی کی نرگس مخمور کچھ کہہ دے اشاروں میں

مزہ ہے رات دن چلتی رہے پرہیزگاروں میں

جنوں میں دیکھیے میدان کس کے ہاتھ رہتا ہے

پڑی ہے آبلوں میں پھوٹ اور ایکا ہے خاروں میں

وہ شرمائی ہوئی آنکھیں وہ گھبرائی ہوئی باتیں

نکل کر گھر سے وہ گھرنا ترا امیدواروں میں

پلک اٹھتی نہیں میری طرف کیا تھک گئیں آنکھیں

ابھی تو ہو رہی تھیں غیر سے باتیں اشاروں میں

کوئی جنت کا خواہاں ہے کوئی کوثر کا طالب ہے

اڑا کرتی ہے بے پر کی ہمیشہ بادہ خواروں میں

جلانا داغؔ کا اچھا نہیں یہ دم غنیمت ہے

کہ ایسا با وفا اک آدھ نکلے گا ہزاروں میں

kisi ki nargis-e-makhmur kuchh kah de isharon mein

maza hai rat din chalti rahe parhezgaron mein

junun mein dekhiye maidan kis ke hath rahta hai

pari hai ablon mein phut aur eka hai kharon mein

wo sharmai hui ankhen wo ghabrai hui baten

nikal kar ghar se wo ghirna tira umidwaron mein

palak uthti nahin meri taraf kya thak gain ankhen

abhi to ho rahi thin ghair se baten isharon mein

koi jannat ka khwahan hai koi kausar ka talib hai

ura karti hai be par ki hamesha bada khwaron mein

jalana dagh ka achchha nahin ye dam ghanimat hai

ke aisa ba wafa ik adh niklega hazaron mein