کل اس کے چہرے کو ہم نے جو آفتاب لکھا

کل اس کے چہرے کو ہم نے جو آفتاب لکھا

تو اس نے پڑھ کے وہ نامہ بہت عتاب لکھا

جبیں کو مہ جو لکھا تو کہا ہو چیں بہ جبیں

یہ کیسی اس کی سمجھ تھی جو ماہتاب لکھا

چمکتے دانتوں کو گوہر لکھا تو ہنس کے کہا

ستارے اڑ گئے تھے جو در خوش آب لکھا

لکھا جو مشک خطا زلف کو تو بل کھا کر

کہا خطا کی جو یہ حرف نا صواب لکھا

گلاب عرق کو لکھا تو یہ بولا ناک چڑھا

اسے نہ عطر میسر تھا جو گلاب لکھا

جگر کباب لکھا اپنا تو کہا جل کر

بھلا جی کیا میں شرابی تھا جو کباب لکھا

حساب شوق کا دفتر لکھا تو جھنجھلا کر

کہا میں کیا متصدی تھا جو حساب لکھا

جو بے حساب لکھا اشتیاق دل تو کہا

وہ کس حساب میں ہے یہ بھی بے حساب لکھا

ہوئے جو رد و بدل ایسے کتنے بار نظیر

تو اس نے خط کا ہمارے نہ پھر جواب لکھا

kal us ke chehre ko ham ne jo aftab likha

to us ne parh ke wo nama bahut itab likha

jabin ko mah jo likha to kaha ho chin ba jabin

ye kaisi us ki samajh thi jo mahtab likha

chamakte danton ko gauhar likha to hans ke kaha

sitare ur gae the jo dar-e-khush ab likha

likha jo mushk-e-khata zulf ko to bal kha kar

kaha khata ki jo ye harf-e-na sawab likha

gulab araq ko likha to ye bola nak charha

use na itr muyassar tha jo gulab likha

jigar kabab likha apna to kaha jal kar

bhala ji kya main sharabi tha jo kabab likha

hisab-e-shauq ka daftar likha to jhanjhla kar

kaha main kya matsadi tha jo hisab likha

jo be hisab likha ishtiyaq dil to kaha

wo kis hisab mein hai ye bhi be hisab likha

hue jo rad-o-badal aise kitne bar nazir

to us ne khat ka hamare na phir jawab likha