کس لئے پروانہ خاکستر ہوا

کس لئے پروانہ خاکستر ہوا

شمع کیوں اپنی جلن میں گھل گئی

منتشر کیوں ہو گئے اوراق گل

چیختی گلشن سے کیوں بلبل گئی

آب دیدہ ہو کے شبنم کیوں چلی

دم کے دم کانٹوں میں آ کر تل گئی

سبزۂ طرف خیاباں کیا ہوا

آہ کیوں شادابیٔ سنبل گئی

کچھ نہ تھا خواب پریشاں کے سوا

اس تھئیٹر کی حقیقت کھل گئی

راہ کے رنج و تعب کا کیا گلہ

جب کہ دل سے گرد کلفت دھل گئی

kis liye parwana khakistar hua

shama kyun apni jalan mein ghul gai

muntashir kyun ho gae auraq-e-gul

chikhti gulshan se kyun bulbul gai

ab dida ho ke shabnam kyun chali

dam ke dam kanton mein a kar til gai

sabza-e-taraf-e-khiyaban kya hua

ah kyun shadabi-e-sumbul gai

kuchh na tha khwab-e-pareshan ke siwa

is thitar ki haqiqat khul gai

rah ke ranj-o-taab ka kya gila

jab ke dil se gard-e-kulfat dhul gai