کس کے ہیں زیر زمیں دیدۂ نم ناک ہنوز

کس کے ہیں زیر زمیں دیدۂ نم ناک ہنوز

جا بجا سوت ہیں پانی کے تا خاک ہنوز

گل زمیں سے جو نکلتا ہے برنگ شعلہ

کون جاں سوختہ جلتا ہے تہ خاک ہنوز

ایک دن گھیر میں دامن کا ترے دیکھا تھا

گرد پھرتے ہیں گریباں کے مرے چاک ہنوز

جستجو کر کے تجھ آفت کو بہم پہنچایا

باز آتے نہیں گردش سے یہ افلاک ہنوز

باغ میں جب سے گیا تھا تو خمار آلودہ

گل ہیں خمیازے میں انگڑائی میں ہیں تاک ہنوز

زخم دل پر ہے مرے تیغ جنوں کا ناصح

تو گریبان کا ناداں سیے ہے چاک ہنوز

کیوں کے سوداؔ میں کروں وصف بنا گوش اس کا

کی نہیں آب گہر سے یہ زباں پاک ہنوز

kis ke hain zer-e-zamin dida-e-nam nak hanoz

ja baja sot hain pani ke ta khak hanoz

gul zamin se jo nikalta hai barang-e-shola

kaun jan sokhta jalta hai tah-e-khak hanoz

ek din gher mein daman ka tire dekha tha

gard phirte hain gareban ke mire chak hanoz

justuju kar ke tujh afat ko baham pahunchaya

baz ate nahin gardish se ye aflak hanoz

bagh mein jab se gaya tha to khumar aluda

gul hain khamyaze mein angrai mein hain tak hanoz

zakhm-e-dil par hai mire tegh junun ka naseh

tu gareban ka nadan saye hai chak hanoz

kyun ke sauda mein karun wasf bana gosh us ka

ki nahin ab-e-guhar se ye zaban pak hanoz