بہت سے زمیں میں دبائے گئے ہیں

بہت سے زمیں میں دبائے گئے ہیں

بہت ان کے عاشق جلائے گئے ہیں

ہمیشہ سے عاشق ستائے گئے ہیں

ہمیں کیا نئے یاں جلائے گئے ہیں

اندھیرا نہ ہونے دیا وصل کی شب

وہ شمعوں پہ شمعیں جلائے گئے ہیں

نہیں بے سبب ان کو مجھ سے رکاوٹ

بہت ہی سکھائے پڑھائے گئے ہیں

نہیں وصل کی ان سے فرمائش آساں

بہت منہ بگاڑے بنائے گئے ہیں

اداؤں کے ناموں کے غمزوں کے مجھ پر

بہت چور پہرے بٹھائے گئے ہیں

نگاہوں کی چھریاں اداؤں کے خنجر

بہت میرے دل پر لگائے گئے ہیں

لڑایا ہے شہ دے کے لوگوں نے ہم کو

بہت روز نقشے جمائے گئے ہیں

میں نالاں نہ تھا تیرے جور و جفا سے

زمانہ کے دل کیوں دکھائے گئے ہیں

دل و دیدہ دو گھر ہیں تشریف لائیں

سنوارے گئے ہیں سجائے گئے ہیں

یہ دنیا ہے اس میں ہمیشہ سے انساں

بگاڑے گئے ہیں بنائے گئے ہیں

بنی آدم اعضائے یک دیگر اند

کہ مٹی سے ہم تم بنائے گئے ہیں

زمیں سے ہی آئے زمیں ہی میں جانا

اسی سے بگاڑے بنائے گئے ہیں

ہمیں پر نہیں ظلم دنیا میں پرویںؔ

بہت لوگ یاں آزمائے گئے ہیں

bahut se zamin mein dabae gae hain

bahut un ke ashiq jalae gae hain

hamesha se ashiq satae gae hain

hamen kya nae yan jalae gae hain

andhera na hone diya wasl ki shab

wo shamon pe shamen jalae gae hain

nahin be sabab un ko mujh se rukawat

bahut hi sikhae parhae gae hain

nahin wasl ki un se farmaish asan

bahut munh bigare banae gae hain

adaon ke namon ke ghamzon ke mujh par

bahut chur pahre bithae gae hain

nigahon ki chhuriyan adaon ke khanjar

bahut mere dil par lagae gae hain

laraya hai shah de ke logon ne ham ko

bahut roz naqshe jamae gae hain

main nalan na tha tere jaur-o-jafa se

zamana ke dil kyun dikhae gae hain

dil-o-dida do ghar hain tashrif laen

sanware gae hain sajae gae hain

ye duniya hai is mein hamesha se insan

bigare gae hain banae gae hain

bani adam aaza-e-yak digar and

ke mitti se ham tum banae gae hain

zamin se hi ae zamin hi mein jana

usi se bigare banae gae hain

hamen par nahin zulm duniya mein parwin

bahut log yan azmae gae hain