کافر بتوں کے نام ہوں کیوں کر تمام حفظ

کافر بتوں کے نام ہوں کیوں کر تمام حفظ

اتنے خدا کہ ہو نہ سکیں جن کے نام حفظ

مطلب نہ خبط ہو کوئی فقرہ نہ چھوٹ جائے

قاصد نے حرف حرف کیا سب پیام حفظ

رونا مرا ہو اور بھی باعث ثواب کا

پڑھتا ہوں سوز میں نے کئے ہیں سلام حفظ

دوزخ کا ڈر نہیں ہے تو پتھر کی آگ کیا

کافر بتو ہمیں ہے خدا کا کلام حفظ

پیتے ہی یاد آ گئے بھولے ہوئے سبق

پوچھو کسی مقام سے ہے ہر مقام حفظ

میخانے میں نماز جو کی تو نے جلد ختم

سورہ بڑا نہ تھا کوئی تجھ کو امام حفظ

تجھ کو قفس میں تیری سناؤں گا گفتگو

صیاد باتیں کی ہیں تری زیر دام حفظ

کس کو نہیں ہے قدر ہمارے کلام کی

لوگوں کو ہے ریاضؔ ہمارا کلام حفظ

kafir buton ke nam hun kyun kar tamam hifz

itne khuda ke ho na saken jin ke nam hifz

matlab na khabt ho koi fiqra na chhut jae

qasid ne harf harf kiya sab payam hifz

rona mira ho aur bhi bais sawab ka

parhta hun soz main ne kiye hain salam hifz

dozakh ka dar nahin hai to patthar ki ag kya

kafir buto hamen hai khuda ka kalam hifz

pite hi yad a gae bhule hue sabaq

puchho kisi maqam se hai har maqam hifz

maikhane mein namaz jo ki tu ne jald khatm

sura bara na tha koi tujh ko imam-e-hifz

tujh ko qafas mein teri sunaunga guftugu

sayyad baten ki hain tiri zer-e-dam hifz

kis ko nahin hai qadr hamare kalam ki

logon ko hai riyaz hamara kalam hifz