ڈھُونڈ رہا ہے فرنگ عیشِ جہاں کا دوام

ڈھُونڈ رہا ہے فرنگ عیشِ جہاں کا دوام

وائے تمنّائے خام، وائے تمنّائے خام!

پیرِ حرم نے کہا سُن کے مری رُوئداد

پُختہ ہے تیری فغاں، اب نہ اسے دل میں تھام

تھا اَرِنی گو کلیم، میں اَرِنی گو نہیں

اُس کو تقاضا روا، مجھ پہ تقاضا حرام

گرچہ ہے افشائے راز، اہلِ نظر کی فغاں

ہو نہیں سکتا کبھی شیوۂ رِندانہ عام

حلقۂ صُوفی میں ذکر، بے نم و بے سوز و ساز

میں بھی رہا تشنہ کام، تُو بھی رہا تشنہ کام

عشق تری انتہا، عشق مری انتہا

تُو بھی ابھی ناتمام، میں بھی ابھی ناتمام

آہ کہ کھویا گیا تجھ سے فقیری کا راز

ورنہ ہے مالِ فقیر سلطنتِ روم و شام

dhund raha hai farang aish-e-jahan ka dawam

wae tamanna-e-kham, wae tamanna-e-kham!

pir-e-haram ne kaha sun ke miri ruidad

pukhta hai teri fughan, ab na use dil mein tham

tha arini go kalim, mein arini go nahin

us ko taqaza rawa, mujh pe taqaza haram

garche hai ifsha-e-raz, ahl-e-nazar ki fughan

ho nahin sakta kabhi shewa-e-rindana am

halqa-e-sufi mein zikr, be nam-o-be soz-o-saz

main bhi raha tishna kam, tu bhi raha tishna kam

ishq tiri intiha, ishq miri intiha

tu bhi abhi natamam, mein bhi abhi natamam

ah ke khoya gaya tujh se faqiri ka raz

warna hai mal-e-faqir saltanat-e-rom-o-sham