کافر تجھے اللہ نے صورت تو پری دی

کافر تجھے اللہ نے صورت تو پری دی

پر حیف ترے دل میں محبت نہ ذری دی

دی تو نے مجھے سلطنت بحر و بر اے عشق

ہونٹوں کو جو خشکی مری آنکھوں کو تری دی

خال لب شیریں کا دیا بوسہ کب اس نے

اک چاٹ لگانے کو مرے نیشکری دی

کافر ترے سوائے سر زلف نے مجھ کو

کیا کیا نہ پریشانی و آشفتہ سری دی

محنت سے ہے عظمت کہ زمانے میں نگیں کو

بے کاوش سینہ نہ کبھی ناموری دی

صیاد نے دی رخصت پرواز پر افسوس

تو نے نہ اجازت مجھے بے بال و پری دی

کہتا ترا کچھ سوختہ جاں لیک اجل نے

فرصت نہ اسے مثل چراغ سحری دی

قسام ازل نے نہ رکھا ہم کو بھی محروم

گرچہ نہ دیا کوئی ہنر بے ہنری دی

اس چشم میں ہے سرمے کا دنبالہ پر آشوب

کیوں ہاتھ میں بدمست کے بندوق بھری دی

دل دے کے کیا ہم نے تری زلف کا سودا

اک آپ بلا اپنے لیے مول خریدی

ساقی نے دیا کیا مجھے اک ساغر سرشار

گویا کہ دو عالم سے ظفرؔ بے خبری دی

kafir tujhe allah ne surat to pari di

par haif tire dil mein mohabbat na zari di

di tu ne mujhe saltanat bahr-o-bar ai ishq

honton ko jo khushki miri ankhon ko tiri di

khal-e-lab shirin ka diya bosa kab us ne

ik chat lagane ko mire neshkari di

kafir tire siwae sar-e-zulf ne mujh ko

kya kya na pareshani-o-ashufta siri di

mehnat se hai azmat ke zamane mein nagin ko

be kawish sina na kabhi namwari di

sayyad ne di rukhsat-e-parwaz par afsos

tu ne na ijazat mujhe be bal-o-pari di

kahta tira kuchh sokhta jan lek ajal ne

fursat na use misl-e-charagh-e-sahari di

qisum-e-azal ne na rakha ham ko bhi mahrum

garche na diya koi hunar be hunari di

us chashm mein hai surme ka dumbala pur ashob

kyun hath mein badmast ke banduq bhari di

dil de ke kiya ham ne tiri zulf ka sauda

ik ap bala apne liye mol kharidi

saqi ne diya kya mujhe ik saghar-e-sarshar

goya ke do alam se zafar be khabari di