چھک گئے ہیں آج اک ساغر سے ہم

چھک گئے ہیں آج اک ساغر سے ہم

ہاتھ دھو بیٹھے مئے کوثر سے ہم

بت کدہ میں جا کے اس بت کا پتہ

پوچھتے پھرتے ہیں ہر پتھر سے ہم

قصد صحرا ہے دل ویراں کے ساتھ

اک بیاباں لے چلے ہیں گھر سے ہم

جب رگ جاں سے کمی کرتا ہے خون

چھیڑ دیتے ہیں اسے نشتر سے ہم

کس قدر کٹتی ہے راہ شوق جلد

تیز چلتے ہیں ترے خنجر سے ہم

کیا کہیں کس سے کہیں کس کے لیے

پھرتے ہیں چاروں طرف مضطر سے ہم

وہ ستم گر روبرو ہوگا تو داغؔ

کیا کہیں گے داور محشر سے ہم

chhak gae hain aj ik saghar se ham

hath dho baithe mai-e-kausar se ham

but kada mein ja ke us but ka pata

puchhte phirte hain har patthar se ham

qasd-e-sahra hai dil-e-wiran ke sath

ik bayaban le chale hain ghar se ham

jab rag-e-jan se kami karta hai khun

chher dete hain use nashtar se ham

kis qadar katti hai rah-e-shauq jald

tez chalte hain tire khanjar se ham

kya kahen kis se kahin kis ke liye

phirte hain charon taraf muztar se ham

wo sitam gar rubaru hoga to dagh

kya kahenge dawar-e-mahshar se ham